David Varela (Xixón, 1975) ye ún de de los músicos profesionales más activos de la escena’l país. Lleva dende los años 80 colos munchos instrumentos que toca arrecostines y tien tocao con tantísimes formaciones que fáise complicáu mentar a toes, poque participó en más de 100 grabaciones, espectáculos y collaboraciones na estaya musical y tamién na teatral. Esti llabor foi reconocíu con una montonera premios que van desde los concursos de música tradicional nacionales y internacionales, hasta los premios AMAS y el Camaretá. Dende 1998 tamién ye docente en delles escueles de música tradicional. Anguaño’l so llabor más visible y personal dientro del ámbitu musical ye como vocalista y curdión de La Bonturné y col so espectáculu pa la reciella Restolando.
Con él siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Llegué a rayar los cedeses ‘Vanilla’ de Blowzabella, y el ‘Live in Italia’ de Skolvan… con ‘La Bandina´l Tombo’ yá fui precavíu; copiélu pal coche pa nun estropiar l’orixinal. Son tres obres d’arte que nun canso de sentir y que podíen enllenar tranquilamente la mio banda sonora al completu.
Meca!!! de guaje quería tocar con Radio Futura… bueno, en verdá quería cantar como Santiago Auserón… Pensái que yá toqué con un centenar de grupos de tolos xéneros y tamién hai dellos grupos mozos que me presten enforma, pero creo que pa retirame, meteríame en cualquier grupu de rock&roll nel que me dexaren tocar el baxu o la batería namás pa los ensayos. De toes formes lo próximo ye una banda de curdioneiros diatónicos nel occidente; toi naguando por ello.
«Creo que pa retirame meteríame en cualquier grupu de rock&roll nel que me dexaren tocar el baxu o la batería namás pa los ensayos»
Suelo componer pensando en persones, anécdotes y esperiencies viviés. De tol repertoriu míu creo que me quedo cola mazurca “Sal a tiempu” y la Jota “La Piquera”… pel momentu.
Nos festivales del cole tocaba muncho la xiblata; da fechu, tuvi tola infancia amargando a diestru y siniestru tol día “firulí, firulá”, pa tolos llaos. Pero pueo dicivos, que profesionalmente foi de rapacín, nuna espicha col tambor y acompañando al mi hermanu JuanCa cola gaita. Tremábame una pata y cuando me sofitaba n’ella pa que parase, tremaba la otra. Gané 1.500 pesetes qu’invertí nunos paliellos; los que llevaba yeren regalu del mayestru Manolo Durán, fechos por Ricardo Moreno y nun quería usalos por mieu a rompelos.
Danme muncha perceguera’l tratu poco dignu que se nos da a los artistes en dalgunos ambientes. Llueu los meses d’espera pa cobrar son mortales… y, anque nun lo creyáis, les redes sociales son mui, mui inxustes, en tolos aspectos.
«Los meses d’espera pa que los artistes cobremos son mortales… y, anque nun lo creyáis, les redes sociales son mui, mui inxustes, en tolos aspectos»
Soi mui fan de l’actual Conseyera de Cultura (incluso siendo Conseyera), pola so disposición, la so educación, el so talentu, el so saber tar. Creo que ta faciendo bon papel, siempre presencial en tolos actos, involucrada y con sensibilidá. Yo quiciás pondría abondu enfotu n’iguar temes como dixebrar circuitos de profesionales y amateur, l’estatutu d’artistes o sofitar la profesionalidá estudiando métodos como la Intermitance francesa.
La referencia musical túvila siempre en casa. Mio pá siempre foi un entusiasta melómanu y a onde llegué débo-ylo sobre manera al mio hermanu Juan Carlos, una década mayor que yo y anguaño retiráu. Agora pensái tamién que yéremos vecinos de Berto Turulla, col que flipábemos enforma. De mui mozu vi a Beleño, a Trasgu y más llueu a Lliberdón… quedóme claro cual yera’l mio camín.
«La referencia musical túvila siempre en casa. Mio pá siempre foi un entusiasta melómanu y a onde llegué débo-ylo sobre manera al mio hermanu Juan Carlos, una década mayor que yo y anguaño retiráu»
Tengo dellos discos compilatorios que me pasó Javier Lueje, que-yos punxo por títulu “Lo más pior” onde amestó grandes éxitos n’español de los 70/80/90. Atopes dende la banda sonora de Verano Azul, Los Stop, Peret o La Bola de Cristal. Pa dir de folixa o facer kilómetros en coche, eso; y Manu Chao del que soi mui fan. Dacuando cai dalgo de “Los Calis” tamién… ¿Esto vais ponelo? He, he ,he
Puff… tuvi oportunidá de tar con munchos personaxes, ya igual se dicir meyor a quién non convidaría. Prestaríame tener conocío a Javier Krahe y traelu pa cantar xuntos “Odisea la Nuí”. Nel backstage xugaríamos al dominó de pareya, escontra Buenafuente y el Gran Wyoming. Yo namás xugaría y sentiríalos falar hasta l’alborecer, con un bon oruxu de guindes caseru.
Tuvi oportunidá de poner banda sonora pa curtios, llibros y dellos testos que se teatralizaron… y de fechu ta acabante d’anunciase daqué que me fai abonda ilusión; pongo música a l’adaptación teatral de La Balada del Norte que va facer la compañía Saltantes. De xuru sería dalgo de Paco Álvarez que ye’l mio autor n’asturianu de cabecera. Pilar Sánchez Vicente ta escribiendo noveles mui guionizables, y nun tardaría n’enguedeyame en dalgún tingláu. Y cualquier relatu de Maxi Rodríguez, Pachi Poncela o Aitana Castaño de xuru que tendría una banda dichosamente acorde cola mio estravagancia.
Suscríbite a les nuestres novedaes
