El grupu punk-rock avilesín Sartenazo Cerebral ta acabante d’asoleyar el so segundu tema propiu n’asturianu. Trátase de ‘Paraísu Pisapraos‘, un cantar que denuncia los escesos del turismu que tán sufriéndose n’Asturies y pal que cuntaron cola collaboración de Reichel (Ochobre, La Mørgue) a la voz y de Natalia González (Ochobre) a la gaita. El cantar yá ta disponible en toles plataformes musicales y acompáñalu un videoclip nel que participen les collaboradores.
«Invasión de cayetanos pelos montes asturianos». Esa frase ye l’entamu d’esti single y nella resúmese perbién lo que contién un cantar que, con ironía, humor y rabia, ataca a les despidíes de solteros, al AVE, al «cachopismu», a los pitufos de la rotonda de Llugones o a la xubida del preciu la vivienda, ente munches otres coses.
‘Paraísu Pisapraos’ ye’l cuartu adelantu del que va ser el sextu discu de Sartenazo Cerebral, formación punk-rock d’Avilés con trece años de trayectoria al costazu. Foi grabáu, amestáu y masterizáu nos Breakdown Studios de Xixón por Nefta Vázquez (Escuela De Odio, Sound Of Silence). Amás, ye’l cuartu tema qu’asoleyen n’asturianu dempués de ‘Fueu nes barricaes‘ y dos vesrsiones pa un tributu a Soziedad Alkoholika y pal discu Engarradiella.
Suscríbite a les nuestres novedaes
