El baille tradicional y les bandes de gaites van tener protagonismu esti branu nes cais d’Avilés. La conceyalía de Festexos d’esti conceyu ta acabante d’anunciar un proyectu nuevu col nome de Sones na cai que tien como oxetivu fomentar el folclor tradicional a traviés de pasacáis per distintes zones del centru d’Avilés. Son un total de catorce actuaciones nes que participen cinco agrupaciones avilesines: Ximielga la saya, Xaréu d’Ochobre, Escontra’l Raigañu, Esbardu y Banda de Gaites Villa de Avilés.
El xueves pasáu Sara Retuerto (conceyala de Festexos), Juan Luis Casas García (Esbardu), Irene González (Ximielga la saya) y Enol Sánchez Lage (Banda de Gaitas Villa de Avilés), presentaron na Casa’l Conceyu esta actividá que, tal como afirmen dende l’Ayuntamientu, «amás d’animar les cais, va suponer da-y puxu a la cultura y música asturiana de la mano de les agrupaciones folclóriques».
«Con esta nueva actividá, que fai medrar la ufierta d’ociu pa toles edaes, nun se potencia y visibiliza namás el folclor tradicional asturianu, sinón que se dinamizarán les cais y places de la villa animando a vecindariu, visitantes y, por supuestu, dando más vida y color al comerciu avilesín y la so hostelería», argumenten dende l’Ayuntamientu. El programa entamó’l pasáu sábadu 15 y va desendolcase dellos fines de selmana hasta’l 5 d’ochobre n’horariu de 12 a 14.30h y a traviés de tres percorríos: Ayuntamiento, La Fruta, Camposagrado, Pedro Menéndez, Sabugo; Carbayedo, Galiana, Álvarez Acebal, Ayuntamientu; y Rivero, Las Artes, Ferrería, Sol, Carlos Lobo.
Suscríbite a les nuestres novedaes
