La Banda Sonora de Lluci G. Palomares
Lluci G. Palomares (Avilés, 1975) ye cantante y panderetera. Anguaño forma parte del colectivu de música tradicional Muyeres y ye cantante solista del grupu de folk celta Corquiéu. Tien collaborao en delles ocasiones con grupos como Dixebra, José Manuel Tejedor, La Bande, D’Urria, Felpeyu y Músicos Pola Oficialidá, amás d’en distintes formaciones de música tradicional y nel proyectu “El mio cantar”.
Con ella siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Sienti la playlist La Banda Sonora de Lluci G. Palomares
Un discu qu’enxamás canses de sentir.
Ye difícil escoyer namás ún, asina que quédome con Rattle and Hum d’U2 (merquélo fai mil años en vinilu y ye ún de los míos LP’s de cabecera) y por supuesto Dual d’Igor Medio y Lisardo Prieto, amás de Salia de Corquiéu y Yá de Felpeyu
Si tuvieres que formar parte d’otru proyectu musical, ¿cuál sería?
Cualesquier proyeutu “panderetil” que caltenga la música tradicional y a la par tenga un puntu tresgresor-contemporáneu y atractivu pal públicu
De los cantares que compusisti o interpretes, ¿cuál ye’l to preferíu?
Prestóme enforma interpretar “Los trabayos d’esti mundu” nel espectáculu Inda suenen de Muyeres con una puesta n’escena mui emotiva. Tamién facer “Penouta” con Felpeyu na Noite Celta de Porcía nel añu 2022, pero enxamás voi dexar de respigame, cántela les veces que la cante, con “Ribeseyana” de Corquiéu.
«Cántela les veces que la cante, enxamás voi dexar de respigame con “Ribeseyana” de Corquiéu»
¿Cuándo foi la primer vez que xubisti a un escenariu y que pasó enantes, durante y depués?
Anque nun yera la primer vez que subía a un escenariu -yá lo ficiera con delles formaciones de baille y escueles de música tradicional-, xusto nesi espectáculu Inda suenen interpreté un set d’añaes nin más nin menos que con Mari Luz Cristóbal Caunedo y Marisa Miravalles nel mio debú con Muyeres nel Teatru Palacio Valdés d’Avilés. Amás de ser un suañu pa mi llegar a formar parte d’un grupu como Corquiéu.
¿Qué ye lo más inxusto de ser artista?
Lo más inxusto son les condiciones tan precaries coles que a vegaes hai que trabayar, sobre tou nel tema desplazamientos, amás de la falta de medios y apoyos de les instituciones en xeneral
Si fueres Conseyera de Cultura, ¿qué son les primeres coses que fadríes?
Miraría un poco más pa la cultura del país. Hai que dexase de tanta “feria de abril” y tirar más polo nueso. Y sobre tou más pola música de grupos, que parez qu’agora namas hai orquestes.
«Con Siniestro Total y sobre tou “Ayatollah” vuélvome una auténtica punki de los 80»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Siempre fui mui fan de Muyeres. Tenía tolos discos que salieren hasta’l momentu y sabíalos de memoria. Amás como buena consumidora de música tradicional taba namorada del so trabayu que sigue paeciéndome inconmensurable. ¡Gracies Muyeres!
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
Siniestro Total y sobre tou “Ayatollah” col que me vuelvo una auténtica punki de los 80.
¿A qué personaxe públicu convidaríes a un conciertu tuyu, a pasar llueu pel backstage y pa qué?
Quedaríame con Joaquín Phoenix, al qu’almiro como actor.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Nunn de Xandru Martino, qu’anque yá lo tengo fai tiempu, toi relleéndolu.
Asina fala Lluci G. Palomares de los cantares qu’escoyó pa la so playlist
“Las l.laranxas de Balsera” d’Igor Medio y Lisardo Prieto. Ún d’esos temes que puedo sentir en bucle.
“Ribeseyana” de Corquiéu. Cómo yá dixi enantes, ún de los meyores temes de la música fecha nel país.
“Llixeros” de Tuenda. Tema “bonrolleru” donde los haya
“Mañana fría” de Dixebra. De los cantares n’asturianu que más me gusten. Ensin dulda.
“Alborada d’Amandi” de Llan de Cubel. Ye mui difícil quedase namás con un tema de Llan de Cubel, pero esti ye’l que más me presta sentir.
“Los fayeos de Mayo” de Felpeyu. ¡Qué dicir d’esti cantar que nun se dixera yá!
“El cura ta malu” de N’Arba. Otru tema pa sentilo en direutu y meyor tovia si tas nun prau
“La revólver” de Muyeres. El cantar ye d’Alfredo González y tanto la música como la lletra gústenme munchisimo, pero si pa enriba siénteslo na voz de Marta Elola…
“Añada pa Gael” de Tejedor. Puru sentimientu sumáu a la maestría de la gaita de José Manuel Tejedor.
“Beneros” de Gatos del Fornu (non disponible en Spotify). Esti discu ye una ayalga y la cuerda nesti tema parezme increíble
“Con tomillo y Romero” de Lucas 15. Creí qu’esti cantar yera imposible d’ameyorar; equivoquéme. La versión del discu La Lluz Encesa de Llan de Cubel xunto col vigulín de Simon Bradley ye sublime.
“La Inverniza” de Xéliba (non disponible en Spotify). Nun se mui bien por qué me presta tanto esti tema, pero ye un subidón sentilu.
“Enzo” d’Aire. Preciosu tango de Ruma Barbero.
“Another man’s woman” de Supertramp. Preciosu tango de Ruma Barbero. Esta ye la mio canción favorita
“My Way” de Frank Sinatra. Tou un himnu.
“Ommadawn” de Mike Oldfield. El mio artista foriatu favoritu y esti discu y esti tema sobremanera.
“Where the streets have no name” d’U2. Encántame U2 y de quedame con ún, sería esti.
“Romeo and Juliet” de Dire Straits. ¡Ye perfeuto!
“Hallowed be the name” d’Iron Maiden. Anque nun lo paeza, soy mui rockera y en cuantes al heavy metal son el mi grupu favoritu. Esta canción ye otru himnu pa los fan de los Maiden.
