Piloña acueye esti fin de selmana les III Xornaes del Vigulín Tradicional

Per tercer añu consecutivu L’Infiestu acueye les Xornaes del Vigulín Tradicional. Del 15 al 17 de setiembre la capital de Piloña va ser tamién la capital d’esti instrumentu gracies a un programa qu’axunta conferencies, alcuentros, jam sessions, cursos, conciertos, xuegos tradicionales, talleres y gastronomía. Too ello de baldre -sacantes los menús vigulineros y el cursu- y con actividaes repartíes ente La Benéfica, el CPF El Prial, la cervecería La Traviesa y dellos restaurantes de Piloña.

Les xornaes entamen el vienres 15 a les 18h en La Benéfica cola conferencia d’Ana Lombardía Estudiando la música popular del siglo XVII: el Manuscrito de Salamanca. N’acabando, a les 20h, va facese’l III Alcuentru de Vigulín Asturianu, que va tar siguíu por una jam session vigulinera na cervecería La Traviesa, a les 22h. Pal sábadu 16 la música en directo va tar bien presente coles actuaciones de Llan de Cubel y el grupu folk castellanu Alicornio, a les 22h en La Benéfica, y cola de Fernando Valle Roso y Silvia Moreno, que van interpretar el so espectáculu Cantares de… y pa neñ@s a les 12h. Nun va ser esta última la única actividá pa la reciella, porque tamién va haber unes Olimpiaes Asturianes con xuegos tradicionales, de les que va ser responsable Sergio Buelga.

Pa la xornada del sábadu destaca tamién el cursu El vigulín nel folk asturianu que, dempués de los cursos El vigulín na tradición asturiana: repertoriu y técniques interpretatives y El vigulín pal baille asturianu: repertoriu y recursos estilísticos, pon el ramu a tres años de formación que transiten dende la tradición al folk contemporáneu pasando pel ámbitu del baille tradicional. Esti taller tien un preciu de 50 € y ta dividíu en dos niveles: el d’Aniciu, impartíu por Lisardo Prieto; y l’Avanzáu que pon Dolfu R. Fernández. Hai 20 places por cada nivel, p’apuntase ye necesario facelo a traviés de la web de LaKadarma y ye de 10h a 14h y de 16:30h a 18:30h nel CFP El Prial.

Homenaxe y gastronomía

El domingu 17 dende les 12 la mañana rematen estes xornaes con tres actividaes más: la bandina Los Gascones va animar les cais de L’Infiestu, en La Benéfica Santi Galguera va dar un taller de baille tradicional, y llueu hai un vermú en danza. Too ello complétase a lo llargo’l fin de selmana colos menús vigulineros qu’ufren los restaurantes L’Estanku (L’Infiestu), Los Llantares de Pelayo (L’Infiestu), Palacete Real (Villamayor) y Bar Pili (Miyares).

«Esti añu, quiximos facé-y un homenaxe al últimu vigulineru vivu de la tradición nel conceyu de Piloña: Antonio Espina Montoto (Villar, Espinaréu). Conocimos a Antonio demientres el trabayu de campu fechu a comuña ente LaKadarma y l’ATOAM pa les I Xornaes del Vigulín en 2021. Dende’l primer momentu que nos recibió na so casa de Villar sentimos l’amabilidá y disposición que punxo pa tresmitinos les sos esperiencies musicales de 70 años atrás», comenten dende LaKadarma -organizadora del eventu xunto al Ayuntamientu de Piloña-, sobre’l protagonismu y l’homenaxe a esti músicu tradicional nel cartelu d’estes III Xornaes del Vigulín Tradicional.

Discos de música tradicional y folk a la venta na tienda