Héctor Braga gana’l ‘Máximo Fuertes Acevedo’ con un ensayu sobre l’asturianada

Un ensayu dedicáu a la música asturiana vuelve a ganar el premiu d’ensayu Máximo Fuertes Acevedo que convoca la Viceconseyería de Cultura, Política Llingüística y Deporte. Si va dos años foi Xune Elipe con Hai una llinia trazada, una obra dedicada a la historia de la música’l país, agora ye Héctor Braga quien algama’l premiu más prestixosu d’ensayu asturianu con Nel cantu la memoria. Ensayu sobro l’asturianada tradicional.

El xuráu destacó que’l trabayu d’Hector Braga ye una «aportación al estudiu y divulgación de la música y cultura asturianes nun trabayu rigorosu y bien documentáu sobre l’asturianada atendiendo a toles estayes qu’intervienen nesta gran seña cultural d’Asturies». Amás, el fallu resalta «l’usu del llinguaxe, natural, fluyíu y correctu qu’imprime axilidá y amenidá a la llectura de la obra».

Héctor Braga Corral (1980) ye doctor n’Historia del Arte y Musicoloxía pola Universidá d’Uviéu, profesor superior de Música y Etnomusicoloxía polos Conservatorios d’Asturies y Castiella-Llión, títulu profesional de Gaita y máster en Comunicación Cultural. Miembru de la Sociedá española de Musicoloxía (SEdeM), ye tamién autor d’una ventena d’artículos d’investigación en revistes especializaes. 

Nel ámbitu de la interpretación vocal de l’asturianada foi campeón en toles categoríes (aficionaos, renovación y absoluta) y ganador en bien de concursos entamaos en Xixón, Mieres o Samartín del Rei Aurelio, ente los años 2007 y 2015. Anguaño dedícase a la docencia.

Mercar llibros de música asturiana