La Banda Sonora de Maxi Areñes
Maxi Areñes ye’l cabezaleru de Fontoria amás de músicu nel so propiu proyectu en solitario. Veteranu de la escena asturiana, lleva formando parte d’ella dende finales de los 80 cuando tocó en Cambaral y yá d’aquella tocaba nun proyectu qu’entendía la música asturiana d’una manera distinta y pionera.
Con él siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Sienti la playlist La Banda Sonora de Maxi Areñes
Un discu qu’enxamás canses de sentir.
Hai más d’ún. Cierto ye que como toi metíu siempres nel estudiu quedo fartucu de sentir soníos, pero si tuviera qu’escoyer un discu del que nun canso ensin dulda sedría “Ommadawn”, d’Oldfield. Otru bien podría ser “L’extraordinaire Tour De France D’adélard Rousseau” de Malicorne, o “Na llende” de Llan de Cubel.
Si tuvieres que formar parte d’otru proyectu musical, ¿cuál sería?
Téngolo clarísimu y espero que la salú me lo permita dalgún día. Sedría un proyectu de rock progresivu, puru y duru. Ya hai daqué falao con xente que lleva munchu tiempu metío nesti campu, de dientro y fuera d’Asturies. Pero como ya dixe, namás si esta salú que tengo permítemelo.
De los cantares que compusisti o interpretes, ¿cuál ye’l to preferíu?
Tengo tres. “Canciu a mio pa” del primer discu de Fontoria, “Tordín” del segundu, y “L’horru muertu” del terceru. Hai vegaes que siento estos temes y entrúgome: “¿Cuando fice esto? ¿De veres escribílo yo?”. Hai cantares mui bonos d’otros compañeros, hai lletristes fabulosos n’Asturies.
«El mio “desvirgamientu” musical nun escenariu foi’ 23 d’avientu de 1988, con Cambaral»
¿Cuándo foi la primer vez que xubisti a un escenariu y que pasó enantes, durante y depués?
La primer vegada que subí a un escenariu, el mio “desvirgamientu” musical nun escenariu foi’ 23 d’avientu de 1988, con Cambaral. Na ilesia de San Xulián de Roces, en Xixón. Alcuérdome d’ensayar na mio casa, alcuérdome del fríu que facía, de la xente que vino a vemos (mediu Trisquel de Xixón taba ellí) y alcuérdome tamién de la cara de mio padre en primera fila.
Tamién alcuérdome de los cagamentos de Manolín Durán, percusionista de pro que tocó con nós, mentanto’ll restu cruciábamos los deos pa que’l Sr. cura nun lu sintiera. Cerramos el conciertu tocando la sintonía de “The pink panther” versión folkie (total yá…) Y dempués del conciertu tiramos pa Xixón, al Trisquel. Y dempués yá sí que nun recuerdo casi nada…
¿Qué ye lo más inxusto de ser artista?
A niveles xenerales nun se valora la profesión, o valórenla a cuatro. La mayor parte de la sociedá sigue pensando que los músicos tan ehí por “hobby”, pa divertilos a ellos. En munchos otros trabayos, l’operariu, el trabayaor, tien un horariu pol que se rixe, nun suelen tar una media de 12 hores metíos nun estudiu, ensayando, grabando, invirtiendo en material que precisen. El seutor precisa d’una regularización. Detrás de cada minutu d’un tema nun escenariu o nun discu, hai munchu trabayu, munches hores invertíes. Ye mui triste que la mayoría de la xente nun seya consciente d’ello.
Si fueres Conseyeru de Cultura, ¿qué son les primeres coses que fadríes?
Buff! nun sé yo… Tal como ta’ll tema, igual dimitía a la selmana (eso sí, asegurándome otru puestín de los fáciles perhí…). Intentaría sobremanera solucionar daqué nel tema tocante a los medios de comunicación públicos, que quiciaves seyan el mayor escaparate del que disponemos, igual habría que facer una especie de “control de calidá”. Caer na “Paconada” ye mui fácil, ufiertar aquello que a la mayoría pueda prestar nun significa que se tea ufiertando calidá por narices, ye cenciellamente siguir la moda reinante y, munches vegaes, los intereses creaos. Y llueu ta la burocracia, que pa cualquier autónomu (o non autónomu) ye lo mesmu que dir a una batalla ensin armes. Hai muncho que meyorar, munchísimu.
«Marcóme mio pá y ver a Beleño nel añu 1986 nun conciertín que dieron na biblioteca Contrueces, en Xixón. Ehí túvelo nidio, quería facer eso que taba viendo y sintiendo»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Esta ye mui fácil, nun principiu, mio padre. Marcóme y animóme munchísimu. Y per otru llau, ver a Beleño nel añu 1986 nun conciertín que dieron na biblioteca Contrueces, en Xixón. Ehí túvelo nidio, quería facer eso que taba viendo y sintiendo.
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
Pues mira, lo cierto ye que nun escucho nada que de la suficiente vergoña como pa sentime culpable. Escucho munchísima música renacentista y barroca, y llueu tamién suelo poner en bucle “The lark ascending” de Ralph Vaughan Williams, ye un compositor que dame muncha paz y fai que surdan guapos sentimientos. Llueu tamién pongo munchu rock progresivu en toles sos variantes, munchu jazz rock, y dalgún trabayu de percusión africana.
¿A qué personaxe públicu convidaríes a un conciertu tuyu, a pasar llueu pel backstage y pa qué?
Nun se, la verdá. Yo soi de los que a día de güei termina el conciertu y tira pa casina cuanto enantes meyor. Pero bono, sí ye verdá que presta munchu cuando la xente que nun ye pública allégase dempués a falar del conciertu y date les sos impresiones. Prefiero eso a soportar a cualquier castrón que va a regalate la oreya porque ye lo que toca.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Tengo dos y de bonos collacios. El primeru ye “Fontenebrosa: el reinu de los silentes”, que obra del mayestru Vicente García Oliva y ye la primera novela xuvenil que se fizo n’Asturies. La otra ye un proyeutu nel que ta trabayando’l collaciu Enrique Carballeira mui lloñe de tolo que fizo hasta agora; espaciu, cosmos, planetes y civilizaciones que ñacen y desaparecen… La cuenta pa encerrame con 10 sintetizaores analóxicos y esfrutar como un rapacín.
