Soto d’Ayer acoyó a miles de persones alredor de la música asturiana

Esti 2022 ta resultando un mui bon añu pa la música asturiana, la cantidá de conciertos protagonizaos por ella, la recuperación d’espacios onde poder amosar el llabor de los y les artistes del país y la respuesta del públicu, asina lo confirmen. Una prueba d’ello foi la Nueche Celta de Soto (Ayer) qu’axuntó a miles de persones nel prau nel que se desenvolvieron los conciertos. La Sociedá de Festexos de Miravalles y la Banda de Gaites ‘El Gumial’, cola collaboración del Conceyu d’Ayer, decidieron volver a entamar esta cita colos soníos tradicionales, folkis y rockeros asturianos. La xornada escomenzaba pela tarde cola primer edición del Concursu de Bandes de Gaites ‘Valles d’Ayer’, nel que participaron una decena d’agrupaciones y que reunió cerca de doscientos componentes d’estes formaciones; darréu llegó’l tiempu del baille tradicional colos grupos Les Ayalgues d’Ayer y Folklor Ayerán, que calecieron l’ambiente y yeren l’antoxana de lo que diba venir depués.

«Problemes de financiación y falta d’apoyu institucional acabaríen por facer desapaecer esta Nueche Celta que marcaría un tiempu y una manera d’entender l’ociu y la rellación cola música del país»

La primer vez que Soto acoyía la Nueche Celta yera nel añu 1996, en plenu esplendor d’esti tipu de festivales; taría celebrándose ininterrumpidamente hasta’l 2007 y per eses once ediciones pasaríen les formaciones más relevantes de la música asturiana y tamién grandes nomes del folk célticu como Flook o Lúnasa. Llegaría a ser ún de los eventos d’esti tipu con más sonadía y prestixu, algamando la categoría de clásicu nel calendariu asturianu. Problemes de financiación y falta d’apoyu institucional acabaríen por facer desapaecer esta Nueche Celta que marcaría un tiempu y una manera d’entender l’ociu y la rellación cola música del país.

«Quince años depués volvíen a dexase sentir los nuestros sones en Soto cola recuperación d’esta cita, gracies a una comisión renovada y al puxu d’una mocedá abierta y plural que nun reñega de les músiques actuales, pero que tamién quier socializar y disfrutar cola música más propia»

Quince años depués volvíen a dexase sentir los nuestros sones en Soto cola recuperación d’esta cita, gracies a una comisión renovada y al puxu d’una mocedá abierta y plural que nun reñega de les músiques actuales, pero que tamién quier socializar y disfrutar cola música más propia. Pa la vuelta de la Nueche Celta, decidióse acertadamente repetir el cartel de la so primer edición, nel que figuraben tres de les bandes fundamentales y cruciales del panorama musical patriu: Felpeyu, Llan de Cubel y Dixebra. Foi tou un lluxu al que’l públicu, integráu por varies xeneraciones -dende les que tuvieren nes primeres ediciones hasta les más nueves-, respondió de manera masiva y foi consciente de la relevancia del espectáculu al que taben asistiendo. Magar los horarios, cuestionaos por asistentes y músicos, les miles de persones ellí presentes aguantaron el tirón y en tou momentu amosaron el so apoyu y ciñu hacia les bandes, coriando y baillando los sos temes emblemáticos. Los veteranos de les tres bandes -Ruma ‘Felpeyu’, Fonsu ‘Cubel’ y Xune ‘Dixebra’- fixeron referencia nes sos alocuciones a que yá tuvieren ellí había ventiséis años y agradecieron la recuperación d’esti alcuentru centráu na música del país. Tocántenes al aspectu puramente musical, poco hai que dicir dao la solvencia y l’apueste seguru de lo que signifiquen estes tres formaciones, que saben conectar col públicu y tocar les tecles precises en cada conciertu. Sones vieyos y nuevos, pieces tradicionales y orixinales, gaites tradi y midi, guitarres acústiques y eléctriques, voces melgueres y esgarraes… de too ello hubo y de too ello supieron disfrutar los y les asistentes.

A final de la Nueche quedaba nel aire una sensación compartida: bienllegada seya la recuperación d’estos espacios de socialización y entretenimientu cola música del país, una manera mui nuestra d’entender l’ociu qu’hai que tresmitir a los más nuevos -ensin refugar les opciones actuales- y puedan medrar también en contestos y con referentes asturianos.

Discos folk y rock a la venta na tienda