Héctor Menéndez Aneiros (Avilés, 1996) ye un músicu multi-instrumentista, compositor y arreglista autodidauta venceyáu a la corriente de la música celta. Tien colaborao como artista convidáu con Carlos Núñez, Luar na Lubre o la Banda de Gaites Villa de Xixón. Fundador de la banda Guieldu, que tien dos premios AMAS a meyor Canción Folk (2023 y 2024). Tamién ye fotógrafu y realizador audiovisual, autor ente otros trabayos del gallardonáu videoclip ‘La Lienda’ de D’Urria.
Con ella siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
L’álbum Mayo Longo, de Carlos Núñez. Con esi discu enamoréme de la música celta de bien piquiñín. Los mios raigaños maternos son gallegos, de Cedeira, el pueblu marineru onde s’asitia’l santuariu de Santo André de Teixido, na mariña ártabra de Ferrolterra, un llugar col que siento una lligazón especial. El discu foi la banda sonora de los viaxes familiares hasta ellí dende Avilés, cola mar atlántica siempres pegadina a la ventana’l coche. Cuando tenía tres añinos, los mios pas lleváranme con ellos al conciertu de presentación del discu na Praza de María Pita d’A Coruña. En plena «fola celta» del 2000, ver aquel conciertu de Carlos Núñez, cola plaza enllena, un escenariu enorme, les lluces de colores… aquello marcóme de por vida y sigue siendo’l discu la mio vida.
Si tuviera que formar parte d’otru proyectu musical, prestábame munchu un supergrupu col espíritu de L’Héritage des Celtes: un proyectu estable qu’axuntara músicos y voces de les distintes naciones celtes, non como una collaboración puntual, sinon como una gran formación con identidá propia, repertoriu y música creada espresamente pa esi colectivu.
«Prestaría formar parte d’un proyectu estable qu’axuntara músicos y voces de les distintes naciones celtes, non como una collaboración puntual, sinon como una gran formación con identidá propia, repertoriu y música creada espresamente pa esi colectivu»
Ye difícil escoyer, pero si tengo de dicir una pieza, quiciabes sedría ‘Rondes’. Ye una tema na que volqué bastante de la mío identidá musical: ye densu, atmosféricu, cuasi místicu. Ta a metá camín ente’l mundu real de les pandereteres de 6 Riales —daqué tanxible, primitivu— y esi otru mundiu más máxicu y etéreu que tratamos d’aportar dende Guieldu. Los soníos paecen salir de lo fonderu’l mar, y tando atentos siéntense hasta la llamada de les ballenes.
El mar cautivóme dende siempres, desde guah.e. Nun sé si tien que ver con que soi almirador de Lovecraft, Verne o Poe, o cola suerte de tener esi mar misteriosu tan cerca, tanto n’Avilés, onde nací, como en Cedeira.
Tando nel institutu, con quince años, montamos un grupu de folk que se llamaba Deilán. Nel arranque, la idega yera tocar namás nes actuaciones de fin de cursu y de Nadal, pero por mediación del profe de música, Iván Román, acabamos xubiendo a un escenariu de verdá en Cangues d’Onís, au se taba cellebrando un festival de bandes de gaites.
El problema foi que malpenes teníemos repertoriu. Cuando acabamos les siete u ocho canciones que sabíemos ya’l públicu pidió otres tres, tuvimos de repetiles, vamos, que fueron bises de verdá. Curiosamente, varies d’aquelles pieces yá les compusiera yo, asina que’l nerviu nun venía tanto del fechu de tocar, sinon de ver si a la xente-y prestaben.
Cuando decidí dedicar tiempu y esfuerciu a facer la mio propia música y plantegame subir a un escenariu, atopéme, xunto a xente que te da sofitu y te tienda la mano, actitúes d’esclusión o despreciu por parte de persones que pa enrrima igual teníes como referentes y que nin te conocen. Nun falo de la crítica al mio trabayu, eso paezme daqué sano y normal. Falo de cuando una diferencia de criteriu musical, d’etiquetes o un xeitu distintu d’entender la música acaba camudando nun prexuiciu personal o peor, nuna barrera pa que puedas avanzar. Paezme que ye inxusto que coses que tendríen de quedar nel terrén puramente artísticu acaben influyendo nes rellaciones o nes oportunidaes que tien un músicu. Pero bonu, tampoco ye daqué esclusivu d’esta escena y les inxusticies formen parte de la vida mesma.
«Paezme que ye inxusto que coses que tendríen de quedar nel terrén puramente artísticu acaben influyendo nes rellaciones o nes oportunidaes que tien un músicu»
Siendo honestu, lo primero sedría celebralu. Y dempués camudaría el xeitu d’entender la cultura: non como un gastu, sinon como una inversión pa la marca Asturies y la so proyeción fuera. Facilitaría la movilidá d’artistes venceyaos a la cultura identitaria asturiana, porque hai festivales na Península y Europa que taríen encantaos de presentar música asturiana ente miles de persones, xente qu’al travies d’esi contautu musical pueden descubrir Asturies, pa visitala, pa vivir, pa trabayar o pa invertir.
Munches vegaes los costes de treslladar un grupu (tresporte, alloxamientu, manutención…) faen que la contratación seya inviable. Tamos nun territoriu periféricu, y eso encarez los desplazamientos, pero tenemos una posición privilexada nel Arcu Atlánticu y redes culturales que podríemos aprovechar más. L’interceltismu ye un bon exemplu, pero nun tendría por qué ser l’únicu.
Miraría tamién qué faen otros territorios que supieron usar la cultura pa reforzar la so proyeción internacional. Irlanda ye un exemplu nidiu onde la música foi clave pa crear una imaxe reconocible en tol mundu. L’interceltismu podría sirvir non namás pa llevar músicos asturianos fuera, sinon pa formar parte d’una rede na que yá tenemos sitiu, xunto a Bretaña, Galicia, Irlanda o Escocia. N’Asturies hai una cultura ablucante, y deberíemos ser más ambiciosos a la hora de proyectala y saca-y partíu.
Dende guah.e, Bieito Romero, de Luar na Lubre, siempre me comentaba los vídeos que xubía a YouTube con covers d’ellos. Llueu conocímonos en persona en 2017, cuando tocaron en Santalla d’Ozcos, y foi en 2019 cuando me propunxo tocar delles temes como convidáu nun conciertu que dieron nel teatru La Felguera y ellí animóme a formar una banda en plan seriu, y tomélo pola pallabra: esi mesmu añu entamé a buscar músicos. Bieito ye un referente pa min, como músicu, como compositor , como profesional de la industria musical y como persona.
Si falamos d’artistes que, siguiéndolos, pudieron espertame l’interés pola música, nun podríen faltar Carlos Núñez, como ya dixi, y Hevia. Sí, soi fíu de la fola celta, y nun tengo complexu por ello, tolo contrariu.
«Podría convidar a Álvaro Queipo. Nun coincidimos munchu en cuestiones ideolóxiques, pero en gustos musicales sí, asina que diba presta-y. Aprovecharía lo del backstage pa intentar convencelu de la importancia que tien pa Asturies la oficialidá del asturianu»
Amás de la Música Celta, préstame munchu sintir otres escenes como’l New-Age, la World Music, R&B y Soft Storm de los 80s y 90s, Funk, Smooth Jazz, Country, Etnopop y hasta Bollywood. Un artista que siempres me encantó foi Phil Collins, tanto cola banda Genesis como en solitario, sobre too los temes más progresivos como ‘Land of Confusion’ o ‘Home by The Sea’. La verdá ye que siento música permanentemente casi tou’l día. Nun podría vivir ensin ella.
Podría convidar a Álvaro Queipo. Nun coincidimos munchu en cuestiones ideolóxiques, pero en gustos musicales sí, asina que diba presta-y. Aprovecharía lo del backstage pa intentar convencelu de la importancia que tien pa Asturies la oficialidá del asturianu.
Prestaríame abondo pone-y música inclusu a un curtiumetraxe, pero pensando a lo grande podría ser una adaptación cinematográfica de Del llau del Nigromante, de Nicolás Bardio. Una novela que trai al terrén asturianu esa fantasía escura d’aire tolkieniano y que coneuta cola estética del romanticismu decimonónicu de la que bebe tamién la música celta.
Una BSO pa esa película podría afondar xusto nel tipu d’atmósferes que tenemos en Guieldu y que yá esploramos en ‘Rondes’: soníos mestos, orquestaciones que evoquen paisaxes, borrina… capes ambientales que tresmitan la presencia de lo invisible. Sería un maridaxe perfectu.
Suscríbite a les nuestres novedaes
