La Banda Sonora d’Humberto Sierra

Humberto Sierra ye’l cantante de Misiva, una banda de punk-rock n’asturianu única, qu’abrió camín va 12 años usando l’asturianu pa facer un estilu qu’hasta’l momentu na mayoría de les veces namás se podía sentir n’inglés. Cola so enerxía, emotividá, optimismu y constancia “Humber” y Misiva fueron abriendo camín, pisando milenta escenarios y faciendo que la llingua asturiana sonara delantre de miles de persones en festivales como’l Resurrection Fest o’l Tsunami Xixón.

Con él siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora d’Humberto Sierra

Un discu qu’enxamás canses de sentir.

Por ser el grupu que me metió’l velenu de la música y por ser el mio grupu favoritu nunca canso de sentir el “Evil Empire” de Rage Against the Machine.

Si tuvieres que formar parte d’otru proyectu musical, ¿cuál sería?

Prestaríame qu’hubiera un grupo n’asturianu rollu La M.O.D.A, o rollu los vascos Nøgen. Dalgo escuchable, “amable” pero con profundidá nes lletres y con una música bien curiada y arreglada. Prestaríame tocar ellí y facer coros a les voces principales.

De los cantares que compusisti o interpretes, ¿cuál ye’l to preferíu?

Ensin dulda, y por ser bastante autobiográficu diríavos que “Povisa” que sal nel discu de “En Pie de Xera”. Escribí la lletra nuna d’eses crisis que se pasen cuando te das cunta de que yá nun yes un rapaz y que tolo qu’un día marcó la to vida y la to mocedá queda tan p’atrás que da muncho vértigu. 

«Prestaríame qu’hubiera un grupo n’asturianu rollu La M.O.D.A, o los vascos Nøgen. Dalgo escuchable, “amable” pero con profundidá nes lletres y con una música bien curiada y arreglada»

¿Cuándo foi la primer vez que xubisti a un escenariu y que pasó enantes, durante y depués?

Tendría 17 años y foi nun chigre de Grau que se llamaba CBC. Tocaba nún grupu colos collacios del insti que se llamaba SHD y facíamos “NuMetal”. El grupu al que teloniábemos yera Try Again onde tocaben Oscar y David colos que güei toi en Misiva. Enantes: nervios. Durante: una sensación inédita hasta aquel momentu. Depués: felicidá. 

¿Qué ye lo más inxusto de ser artista?

Lo poco reconocío que ta, lo poco que se ve tol trabayu qu’hai detrás y, nel mio casu, al cantar n’asturianu y nún estilu minoritariu, la poca visibilidá y el poco valor que se nos da equí n’Asturies pol públicu “non militante” por decilo de dalguna manera.

Si fueres Conseyeru de Cultura, ¿qué son les primeres coses que fadríes?

Nun poner tantes trabes a la música en directu, fomentar un circuitu de música n’asturianu estable  y utilizar les plataformes que yá esisten como la RTPA pa esparder la montonera de grupos y de xente con talentu qu’hai nun país tan pequeñu como Asturies.

«Yo sentía música n’inglés sobre too y prestábame’l punk, el hardcore… Entós, un día un collaciu sacó de la biblioteca de Grau los discos de “Dieron en duru” y “Glaya un país” de Dixebra y pasómelos diciendome “vas flipar, Humbertín”. Y sí, FLIPÉ»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Nel mio casu foi mui evidente. Yo sentía música n’inglés sobre too y prestábame’l punk, el hardcore… Entós, un día un collaciu sacó de la biblioteca de Grau los discos de “Dieron en duru” y “Glaya un país” de Dixebra y pasómelos diciendome “vas flipar, Humbertín”. Y sí, FLIPÉ. Nun imaxinaba que podía facese esa música n’asturianu y yá cuando los vi en directu na nueche celta de Santu Adrianu quedé clisáu hasta güei. Asina que podría dicir qu’esa foi la mio “nueche d’iniciación” 

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Agora, como yá toi refalfiáu y toi más vieyu nun me da vergoña dicir que me presta tal o cual música… Enantes sí, yéramos más “talibanes” en Grau. Jeje Pero de xuru que vos sorprende que yo yera mui fan de Carla Bruni, o Carla Sarkozy… Yá sabéis que soi profe de francés entós ye una debilidá… 

¿A qué personaxe públicu convidaríes a un conciertu tuyu, a pasar llueu pel backstage y pa qué?

Esta entruga ye la más complicada de toes y hai tantos ámbitos de xente público… Igual me prestaba echar una parrafada y comentala col gran Greg Graffin de Bad Religion, o con Zack de la Rocha o Eddie Vedder. Nun sé, abrir una birra y falar de la vida ensin más.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Anque la nuesa música nun pega muncho, o sí, qué sé yo… Prestaríame ver dalgo audiovisual de los rellatos de la “Hestoria Universal de Paniceiros” de Xuan Bello o, por ser de lo cabero que lleí, “Nel ríu la fame” de Pilar Arnaldo poles hestories tan dures y tan tresversales nes que se pueden ver reflexaes tantes asturianes adultes.

Asina fala Humberto Sierra de los cantares qu’escoyó pa la so playlist

1. Bullet in the head – Rage Against the Machine

Con esti discu entamó too. La enerxía, la rabia y la potencia que tenían estos enriba un escenariu marcáronme pa siempre dende la primer vez que los sentí. Foron los que prendieron la mecha.

2. State of love and Trust – Pearl Jam

Son la otra banda fetiche mía. Metiómelos el mio hermanu a calzador y cuando los descubrí por mi mesmu, yá conocía la discografía. Cantar esti tema al altu la lleva ye una de les meyores coses de garrar la guitarra.

3. My own way – Pennywise

Estos tienen muncha culpa de que Misiva faiga l’estilu de música que fai. Podía quedame con cualquier tema pero esti ye de los que más me presta.

4. Modern man – Bad Religion

Otros culpables de lo que somos Misiva güei. Tienen munchos himnos pero esti sácame la sonrisa y ponme a sotripar el pescuezu ensin parar.

5.Ggood Looking out – Sick of it All

Nun puede faltar na banda sonora de la mio vida un poco de NY HxC. Voi garrar esti temón que representa mui bien l’estilu y que me xubi la pila hasta’l tope. Enerxía y mala hostia condensada ensin remilgos.

6. I could have lied – Red Hot Chili Peppers

Otros básicos na mio vida. Podía ponete milenta cantares pero quédome con esti que siempre me sirvió en momentos de baxón.

7. Welcome to paradise – Green Day

Otru tema de la mio adolescencia. Nun sería lo mesmo ensin los primeros Green Day.

8. Los lobos – La M.O.D.A

L’últimu grupu al que m’enganché a lo lloco. Esti tema pémeque reflexa mui bien el mundu alloriáu nel que vivimos. Unes lletres enormes esti grupu. De lo meyor.

9. Trompetes de Xericó – Desakato

Ensin pallabres. Pa mí son como hermanos y al empar soi mui fan. Podría poner cualquiera d’ellos pero facer estos temazos n’asturianu y llevalos a tanta xente ye dalgo que nunca-yos podremos agradecer lo suficiente.

10. Fálame – Mala Reputación

Esta lletra espeya tan bien lo que-y pasa al nuesu idioma d’una manera tan tienra y tan lliteraria, de cómo se ruempe esa tresmisión xeneracional… Otros tótems de la música asturiana y unos lletristes espectaculares.

11. Indios – Dixebra

EL TEMA. Otros de los que podría poner milenta cantares pero quédome con esti. La lletra, la historia, la música, la melodía de la gaita nel break… Un de los mios temes favoritos de tolos tiempos.

12. Campu de Batalla – Skama la Rede

Difícil d’escoyer una. Otros que prendieron la mecha de cantar n’asturianu. Alcuérdome de tar nun conciertu pola oficialidá colos collacios cantando esta lletra al altu la lleva como ún de los meyores recuerdos que tengo de conciertos.

13. QLTiando – La Tarrancha

Tuvi la suerte de colaborar nesti temazu con munches de les voces más mítiques d’Asturies. Un temón pa echar unos bailles y unos culetes.

14. Calcar na tená – Los Berrones

Nun pueden faltar por míticos. Otros qu’espardieron la llingua per tolos llaos. Esti tema yera un clásicu de les xuntances coles guitarres tando d’espicha o nos conciertos acústicos qu’entamábemos en Grau pa Navidá.

15. Los Fayeos de Mayo – Felpeyu

Pamidea igual ye’l meyor tema n’asturianu. Nun sé explicar con pallabres lo que me resuena esti cantar y lo que me fai sentir. La lletra, el dulzor de la voz, cómo ruempe la gaita tres el segundu estribillu… Nun sé, creo que representa mui bien con música lo que foi y lo que ye Asturies no emocional.

16. Matalalluna – Llan de Cubel

Un TEMÓN con toles lletres. Magar que seya folk, ye un tema cañeru onde los haiga. Da pa faer una versión punkrockera o hasta metalera.

17. Muñeira para a filla da bruxa – Rodrigo Cuevas

Otru que ta reinventando y llevando la música asturiana per tolos llaos. De lo meyor que salió d’Asturies n’años.

 18. Clashturies – Soncai System

Esti discu tenía que tenese tocáu en directu y esi grupu tenía qu’esistir. Una pena por que ta enllenu temarrales. Ente ellos esta xoya.

19. Raru Crustáceu- Pop Piquiñín

Toi notru momento vital cola paternidá. Poder sentir, cantar y baillar bona música n’asturianu ye una ayalga increíble. Podía garra munchos pero con esti facemos pogo en casa colos neños.

20. Cañicón – Xentiquina / Dixebra

La orixinal de Xentiquina, tamién pol momento vital nel que toi yá forma parte de la BSO de la mio vida, agora, la versión de Dixebra ye espectacular.

Mercar discos de Misiva