“Caldueñu” ye’l primer videoclip de Burbús
Yá aportó’l primer videoclip de Burbús, “Caldueñu“. Trátase d’una reellaboración d’esta xota tradicional asturiana fecha dende la personalidá d’esti grupu nuevu, que se define como un proyectu que «nun tien xéneru musical» porque la so música «ye xenérica en sí mesma». Esti cantar de Burbús -grupu que garra’l so nome del verbu burbusar, que ye falar en voz mui baxo con daquién pa que nun s’enteren otres persones de lo que se diz-; ye’l primeru d’una serie de singles que van asoleyar nes plataformes dixitales.
«Quixímos entamar con una de les xotes más conocíes del repertoriu asturianu, “Caldueñu”. La manera trabayar esta pieza arranca dende lo personal, ya adiéntrase na imaxen d’un panorama de dureza ya escuridá onde la melodía tradicional acaba atopando el so llugar, tres pasar per dellos momentos d’incertidume», desplica’l grupu sobre esti cantar que ponen como «un bon exemplu del conceptu de Burbús»,
Cinco veteranos de la escena sonora asturiana formen esti grupu que nació en 2021: a les gaites y flautes, José Luis García -director de la Banda de Gaites Villa de Xixón, Magüeta y Villa de Jovellanos-; al violín, Juan Diego Gómez -que tien tocao en proyectos d’estilos tan estremaos como’l folk, rock, techno, gypsy jazz o heavy metal-; al curdión, Ginés Fernández -músicu de formación clásica que tocó n’agrupaciones d’esti calter y tamién bandes folk-; a la voz y a la guitarra José Martínez -más conocíu nos últimos años como Ún de Grao gracies al so proyectu en solitario, anque tien tocao nuna montonera bandes-; y al baxu, chelo y coros, Javier San Marcos -venceyáu a grupos jazz y blues-.
