Dubstep, drum&bass, spoken word y música tradicional, asina suena ‘Clá 83’ de Tasio

Yá ta en toles plataformes musicales y en CD Clá 83, el primer trabayu discográficu de Tasio. Esti artista venceyáu a la música asturiana y la electrónica dende hai 20 años axunta estes dos corrientes musicales nel so proyectu en solitariu que presentó l’añu pasáu. Nos once temes que formen el so debut suena «dubstep, drum&bass, rap, spoken word… too pasao pol filtru de lo tradi y con un toque bastante pop, sobre manera na forma de cantar», como destaca Dudu García, alter ego de Tasio, que va presentar el 27 de marzu’l discu en directo nos Kuivi Almacenes.

«Cada cantar ye d’un palu diferente, cuéstame muncho encasillar los temes nun estilu», desplica’l músicu alrodiu les sos composiciones, toes elles feches por él mesmo inspirándose na tradición sonora del país y nos sos gustos musicales contemporáneos. En cuantes a les lletres, comenta qu’estes «falen de coses d’Asturies: histories, situaciones, bromes y fantasíes. Por poner un exemplu, la de ‘Tornó’, fala d’un rapaz que marchó d’Asturies pa buscar trabayu n’Escocia, y llueu vuelve pola señarda».

L’álbum ta grabáu, masterizáu y amestáu por Zeros, producíu pol propiu Tasio y cunta coles collaboraciones d‘Alba Menéndez (ex 6 Riales) a la voz, Xuan Bertrand (La Tarrancha) a la guitarra y Andres Rodrigues (Caldo & Os Rabizos) a la gaita. «Toi mui contentu col trabayu fechu, supunxo pa mí una esperiencia mui positiva y diome muncha confianza en mi mesmo, sobre manera como cantante y compositor», valora Dudu García, músicu curtíu en formaciones como Merlín, Cuchu o El Velcro, 

Conciertu nos Kuivi Almacenes

Tres de llanzar el videoclip de ‘La seca‘, la «listening party» que fizo’l pasáu domingu colos sos siguidores y el llanzamientu de güei; Tasio yá trabaya nel so próximu pasu, llevar l’álbum al directo. «La presentación va ser el 27 de marzu, nos Kuivi Almacenes, cola participación de la xente que collabora nel discu«, comenta esti músicu que tien la intención de «mover el discu lo más que puea y facer bolos n’Asturies y per fuera«. Col llanzamientu de Clá-83 medren les referencies d’una escena electrónica y asturiana na que cada vegada s’enmarquen más proyectos musicales.