La primer referencia de llarga duración de Tasio, Clá 83, va ver la lluz el próximu vienres 13 en CD y en formatu dixital en toles plataformes musicales. Pero enantes esti proyectu de música electrónica y asturiana creáu por Dudu García va organizar una «listening party» en Bandcamp na que la xente va poder sentir el discu enteru y facer comentarios y entrugues al artista nun chat.
Drum&bass, asturianada, ritmos de música tradicional, rap… son dalgunos de los estilos que suenen a lo llargo los once temes que formen Clá 83, un discu nel que toles pieces son obres de composición propia en cuantes a música y lletres. L’álbum ta grabáu, masterizáu y amestáu por Zeros, producíu pol propiu Tasio y cunta coles collaboraciones d‘Alba Menéndez a la voz, Xuan Bertrand a la guitarra y Andres Rodrigues a la gaita.
El discu va recoyer dos de los singles que Tasio foi llanzando dende 2024 –‘Tener praos‘ y ‘La seca‘- y tolos detalles van poder conocese na «listening party» d’esti domingu o’l vienres que vien cuando s’asoleye. «Ye un álbum con un estilu propiu nel que se reconocen los raigaños y nel que nun hai barreres d’estilu o forma», son les pallabres coles que Dudu García resume’l so primer trabayu en solitario dempués de cuasi dos décades rabilando pente la música tradicional y la electrónica.
Suscríbite a les nuestres novedaes
