El xueves 4 de mayu va salir a la cai A Contraforga, el primer trabayu de La Bonturné. La banda formada polos veteranos músicos Merce Santos (zanfona), David Varela (voz, acordión y percusión), Santi Caleya (saxu sopranu y gaita) y David Casillas (Contrabaxu); va presentar lo que Santi Caleya define como «tres cuartos d’hora de música asturiana» arreglada pa que «toles pieces seyan baillables y toes tengan calidá». El trabayu yá se pue acutar en musicasturiana.com por 12 € pa recibilu’l mesmu día del llanzamientu.
«Tenemos dalgunes pieces d’autor, cuasi la metá, y lo que ye tradicional pues ta dao tanto la vuelta que prácticamente ye música orixinal», desplica Caleya sobre les nueve pieces que formen l’álbum. El nome del títulu vien porque, en palabres del saxu y gaiteru, ellos son unos músicos que «yá dende La Bandina y agora tamién con La Bonturné ta un poco A Contraforga, nel sen de dir fuera de la llínia habitual que se fai nel folk asturianu en cada época correspondiente».
D’esta manera, con La Bonturné ye inevitable alcordase de La Bandina, la formación de la que Santos, Varela y Caleya fueron cabezaleros. Santi Caleya desplica que «el xeitu de facer los arreglos, la tímbrica col acordión, la zanfona, el saxu sopranu y la gaita, sigui en La Bonturné. Pero agora’l contrabaxu da-y un aire preciosu y anque na rítmica y na manera d’entender la música puea pacese a La Bandina, esto ye otra vuelta más; incluso los arreglos son meyores».
Xira d’un discu esperáu
El 3 de mayu nel Teatru Xovellanos de Xixón -dientro del ciclu Encaja2-; el 6 de mayu en Llanera y el 14 de xunetu n’Uviéu son les primeres feches de la xira d’A Contraforga, un discu que va aportar bastante tiempu dempués de que se formara esti grupu bal folk. Caleya cuenta que fueron «buscando un repertoriu afayadizu pa que tenga un mínimu d’altor» y que fueron «desechando coses hasta algamar un repertoriu curiosu pa facer un CD completu». Tamién sorraya «la crisis de la escena musical dende 2008; que causa trabayar demasiáu pa poco rendimientu». Sicasí, tanto ellos como’l so públicu amosaron tener «la paciencia suficiente» y a partir del 5 mayu va poder sentise’l resultáu. Mentanto, ta disponible’l primer adelantu en toles plataformes dixitales, «La Punta’l Boquerón«.
Suscríbite a les nuestres novedaes
