El Gobiernu del Principáu d’Asturies ta acabante de presentar el programa d’actos pa la 44 Selmana de les Lletres Asturianes, que va tar dedicada Xosé Bolado, poeta y críticu lliterariu fináu en 2011. Va desendolcase del 28 d’abril al 6 de mayu y, dientro de la so programación, va haber tres actuaciones poéticos musicales -l’espectáculu Flores escontra’l desamparu y los conciertos de Mestura y Tierra acompañando a delles poetes-, amás del musical Historia d’un bosque.
Los actos musicales arranquen el llunes 1 de mayu a les 18h nel Teatru de La Llaboral de Xixón col recital poético-musical Flores escontra’l desamparu dedicáu a la obra de Xosé Bolado. La obra ta dirixida por Ana Lamela y nella intervienen los actores Carlos Alba y Laura Cuervo, la sopranu Susana Gudín (Taranus), Delia Gutiérrez a la flauta y Iván Fernández a la tiorba. La entrada ye llibre pero hai que la acutar.
El martes 2 de mayu a les 18.30h, nel Auditorio As Quintas d’A Caridá, el dúu Mestura va acompañar colos sos instrumentos al recital poéticu Hailas. Homenaxe ás poetas del Navia-Eo. Per otru llau, los díes 3 y 4 de mayu va representase’l musical familiar Historia d’un bosque, una obra del mayestru, músicu y fundador de Seliquín y Xentiquina, Nacho Fonseca. Nella participen la Orquesta Sinfónica del Principáu d’Asturies (OSPA), el Grupu d’Animación Musical Escolar (GAME), la Escuela de danza Alazne Castaño y les voces femenines de la Escuela de Música Divertimento y Siero Musical. Esta actuación -que ye’l Conciertu de Les Lletres Asturianes d’esti añu- va ponese n’escena nel Teatru de La Llaboral el miércoles 3 a les 10 y 12 la mañana y el xueves 4 a les 19.30h.
Más poesía y música
Pa rematar los actos, el 6 de mayu a les 12h nel Muséu Nicanor Piñole de Xixón va haber un alcuentru de poetes actuales con una actuación musical alredor de la obra de Xosé Bolado, al cargu del grupu Tierra y Eco (Ana Lamela y Carla Miranda).
Suscríbite a les nuestres novedaes
