El xueves 20 d’abril va asoleyar en toles plataformes dixitales Perdayuri el segundu cenciellu del grupu de música celta y new age Guieldu. Sicasí, un día enantes, el miércoles 19 a les 21h, Musicasturiana.com va estrenar n’esclusiva na so canal de YouTube los dos cantares que formen esti llanzamientu: «Perdayuri (Do Not Stand at My Grave and Weep)» y «La Regueira de los Danzantes».
El primer cantar que-y da títulu al trabayu ye “Perdayuri”, ye d’autoría propia. La so lletra, n’inglés, ye’l famosu poema “Do not stand at My Grave and Weep” (“Nun pares a llorar na mio tumba” al que Guieldu ta poniendo voz y música col so particular estilu, entemeciendo instrumentos acústicos (violín, ocarina, bouzouki, batería…) y electrónicos (sintetizadores, programaciones…) pa crear esa atmósfera evocadora del celtismu románticu que yá reflexaron nel so trabayu anterior. Esti cantar cunta amás cola collaboración del gaiteru Jesús del Castillo, ún de los ganadores del concursu Runas 2022 del festival de Ortigueira.
El segundu tema ye la “Regueira de los Danzantes”, una pieza instrumental que toma por base la “Danza del Rei Nabucodonosor” qu’en realidá ta compuesta por dellos llazos (partes) caúna con un ritmu. Vien del pueblu de Corporales de Cabrera, una de les contornes de la provincia Llión onde se caltien más vivu l’asturlleonés. Según cunten foi recuperada por Moisés Llébana, gaiteru al que-y tararearon la pieza nun tiempu onde taba a puntu perdese. El títulu “La Regueira de los danzantes” fai referencia a la parte’l pueblu onde los danzantes ensayaben.
Presave
Amás del estrenu en YouTube, la formación pon a disposición del públicu un enllaz pa que la xente puea añadir previamente’l single nes sos llistes de reproducción de Spotify, Apple Music, Deezer o Tidal y qu’ésti tea disponible’l mesmu día del llanzamientu oficial.
Suscríbite a les nuestres novedaes
