La Bonturné y La Garrapiella abrieron la quinta temporada d’Amosando
El de bal-folk La Bonturné y la bandina La Garrapiella foron les dos bandes encargaes d’abrir el domingu 18 de xunu la edición 2023 d’Amosando, el ciclu de presentaciones de novedaes discográfiques impulsáu por musicasturiana.com, con un formatu ente conciertu acústicu con aforu reducíu, programa de televisión y alderique.
A les 12.30h del mediudía abrieron el conciertu La Bonturné, nuevu proyectu bal-folk formáu por tres de los músicos más renomaos del folk asturianu -David Varela, Santi Caleya y Merce Santos- xunto a David Casillas. Nel so primer discu, A Contraforga, axunten temes de tastu popular iguaos pal baille
Dempués llegó’l turnu de la bandina La Garrapiella, formación qu’apuesta por renovar la propuesta musical, instrumental y estética d’esti tipu de formaciones tradicionales y asina afondar en soníos más actuales. Esmesando ye’l so primer discu y el reflexu de too esto.
El públicu asistente pudo disfrutar d’un conciertu especial, nel que se llendó l’aforu a una decena de persones y nun espaciu bien distintu y underground como son Les Naves d’El Natahoyo. Tamién hubo tiempu pa que la xente pudiera aldericar colos grupos dende la cercanía, mercar los sos trabayos discográficos y hasta que los artistes-yos los dediquen cola so firma. Precisamente, esta cercanía y interacción ente grupos y públicu ye una de les característiques d’esti formatu únicu n’Asturies.
Cinco ediciones y 22 artistes
Amosando nació en marzu de 2019 a idea de la plataforma musicasturiana.com. Nesti tiempu tocaron 22 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel, Algaire, Mostru L’Horru y Slum Suit La suma de los videos de los conciertos algama más de 200.000 reproducciones en YouTube.
Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez y subvencionada pola Fundación Municipal de Cultura y Educación de Gijón/Xixón.
*Semeyes de David Varela.
