Ruma Barbero y Xune Elipe presenten les sos obres nueves na Semana Negra

Hasta’l 17 de xunetu Xixón acueye la Semana Negra nos antiguos astilleros de Naval Gijón. Musicasturiana.com tien un puestu de venta de discos y, aprovechando’l calter lliterariu d’esti eventu, organiza’l xueves 14 a les 18:30h la charra Música asturiana y lliteratura. El Bar Kamtxaka (asitiáu frenti al stand de musicasturiana.com) ye l’espaciu nel que Ruma Babero y Xune Elipe van compartir mesa pa presentar los sos últimes obres que tienen a la música como protagonista: el cómic Seltegu, l’ensayu Hai una llinia trazada y el discu-llibru de Dixebra Ente la niebla.

Seltegu’ ye’l cómic de Ruma Barbero (músicu, dibuxante y guionista, lletrista, diseñador…) que fala sobre la xira libanesa de Felpeyu en 2005. Una historia qu’axunta diariu de viaxe, conflictu d’Oriente Medio y faltosismu asturianu, y que ganó’l XI Premiu Alfonso Iglesias de cómic convocáu pol Gobiernu del Principáu d’Asturies. A lo llargo de 128 páxines esta novela gráfica impresa a too color cuenta la historia de cuando nel añu 2005 la embaxada española de Líbanu contrató al grupu de folk asturianu Felpeyu pa dar un conciertu dientro’l festival «Fête de la musique» que festexaba los 15 años de paz dende la fin de la guerra civil de 1975 a 1990 y, aprovechando’l viaxe, xirar una selmana per dellos festivales y centros culturales del país de los cedros.

Hai Una Llinia Trazada’ ye’l llibru de Xune Elipe (Dixebra, Goxe/L’Aguañaz, Soncai System…) dedicáu a la historia de la música asturiana y ganador del XXVI Premiu Máximo Fuertes Acevedo d’ensayu. A lo llargo de 240 páxines y 25 capítulos, esta obra percuerre’l fechu musical asturianu dende los sos anicios hasta la dómina actual. L’autor fai un repasu pelos periodos, movimientos y intérpretes más importantes, resaltando los datos y fechos que foron cruciales nel devenir de la nuestra música. Y ello dende un puntu de vista non colonial, considerando a la música asturiana como un ente vivu y autónomu, non supeditáu nin dependiente d’otros procesos. Una historia contada dende dientro de la propia música del país, con un enclín claramente pedagóxico-divulgativu y militante nacional, social y culturalmente.

‘Ente la niebla’ ye la obra más ambiciosa y personal de Dixebra, un trabayu conceptual alredor de la historia, la llucha y la significación del movimientu obreru y les clases populares asturianes. Nesti llibru-CD collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana. Nel terrén musical, el discu ta formáu por venti cantares nos que van dexase sentir composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega.

Dexa un comentariu

X