Radiotelevisión del Principáu d’Asturies (RTPA) va celebrar esti xueves los sos venti años al serviciu de la ciudadanía asturiana con «RTPA 20 años contigo», un programa especial en formatu gala que va reunir nel escenariu del Teatru de la Llaboral a voces y cares de la cadena, amás d’una amplia representación de la escena musical y cultural asturiana.
La gala va tar presentada por María Herrero y David Arango, que van facer un percorríu por dos décades d’información, divulgación y entretenimientu marcaes pola vocación de serviciu públicu de RTPA. La música va tener un papel destacáu nel programa, que va emitise a partir de les 22:30 hores n’A7 y en rtpa.es, y tamién n’A8 con interpretación en llingua de signos.
El programa va contar coles actuaciones de Rodrigo Cuevas, Los Berrones, Herbamora, Eva Hevia, la Banda de Gaites Villa de Xixón, José Ángel Hevia y el Coru Mineru de Turón, nuna propuesta que va combinar música y memoria audiovisual pa repasar estos primeros venti años de la radiotelevisión pública asturiana.
La celebración va contar tamién cola participación de profesionales de los Servicios Informativos y Deportes, amás de representantes de los distintos espacios de TPA y RPA. A lo llargo de la gala van recuperase dellos de los momentos más destacaos de la historia de la cadena y van presentase les principales novedaes de la programación pa esta nueva temporada.
Al actu van asistir, amás, representantes de los ámbitos audiovisual, cultural, institucional y empresarial d’Asturies, xunto con miembros de la sociedá civil y persones de l’audiencia de RTPA, que van acompañar a la cadena na celebración de los sos venti años.
Suscríbite a les nuestres novedaes
