Esti miércoles 3 de xunu la Conseyería de Cultura, Política Llingüística y Deporte del Principáu d’Asturies entama actividaes en dellos conceyos coles que festexar Día Mundial de la Sidra y de la cultura articulada alredor d’ella, que dende 2024 ye Patrimoniu Cultural Inmaterial de la Humanidá. Dientro de los actos va haber espaciu pa la música asturiana a traviés de la participación del grupu Forma Antiqva.
El Paraninfu de Llaboral Ciudá de la Cultura, en Xixón, va acoyer dende les 17.30h l’actu central d’estes xornaes coles que’l gobiernu asturianu quier «poner en valor una tradición que constitúi una de les principales señes d’identidá d’Asturies». Nél, amás d’una mesa redonda sobre la cultura sidrera; de la intervención de la Conseyera de Cultura, Vanessa Gutiérrez; y d’un brinde con sidra asturiana; va haber un conciertu especial de Forma Antiqva. La banda formada polos hermanos Aarón, Daniel y Pablo Zapico va poner música a una proyección única d’un montaxe especial de la película «Bellezas de Asturias», rodada pola empresa El Gaitero nes primeres décades del sieglu XX, que retrata la vida cotidiana de la época, los procesos d’ellaboración de la sidra, los ritos y manifestaciones culturales que la integren, asina como la so esportación, al traviés del importante papel que xugaron los centros y la emigración asturiana n’América.
Nesta actuación de Forma Antiqva van sonar dellos de los temes de De Sópitu, álbum que supón una esploración de les conexones ente la música de raigañu y la clásica. Cantares populares como ‘El señor cura de la Piñera’, ‘¡Que m’escurez!’ o ‘Santa Bárbara bendita’ suenen nel repertoriu d’esti nuevu proyectu de los hermanos Zapico xunto con otres melodíes del Arcu Atlánticu. Asina ye como
Forma Antiqva nació en Llangréu va más de dos décades y ye una de les formaciones más influyentes y reconocíes de música clásica nel Estáu español. Mesmo en tríu -colos hermanos Zapico como solistes- que como orquesta barroca, aborden el repertoriu instrumental y vocal de los sieglos XVII y XVIII. Siempre cerca de l’actividá creativa que-yos arrodia, participen davezu en proyectos multidisciplinares y, amás, amuesen el so compromisu pa cola docencia, la divulgación y la evolución del sector de la industria musical.
Suscríbite a les nuestres novedaes
