Yá ta en toles plataformes musicales ‘Vuelta‘, l’adelantu nuevu del que va ser el primer EP de La Ciudá nel Mar, formación moza folk, indie y canción d’autor. Tres de ‘Foles ermes‘ y ‘Lluminaria‘, el cuartetu torna col tema más pop de los que llanzó hasta la fecha y pal que cunten cola collaboración al baxu de Sergio Rodríguez y de Luis Senén Fernández a la batería.
«Ye’l primer cantar qu’arreglemos al xuntanos, asina qu’a nós suénanos al nuestru entamu. Y eso que, precisamente por ser el primeru, ye ún de los que más se foi tresformando, amoldándose al nuesu camín», desplica Marina Pangua, vocalista y percusionista de la formación, en rellación al tema. Esa tresformación a la que fai referencia acompañólos hasta’l final: «Surdió la idega, yá nel últimu ensayu enantes de grabar, de meter un puntéu cola guitarra llétrica d’Andrés y encantónos el resultáu. Quiximos tamién ver cómo sonábemos con batería y baxu y tuvimos claro que’l tema pa probalo yera esti, asina que la sonoridá ye diferente de la de los otros temes del EP».
D’otra banda, la lletra «fala d’un momentu vital de cambéu: la efervescencia que produz venir de tarrén desconocío, lo reconfortante de volver —anque camudemos de casa, lo cíclico de les estaciones siempre vien a danos paz a lo llargo de tola vida— y la certeza de que lo que foi importante, nunca termina. Eso queda siempre con nosotros», comenta la tamién lletrista al rodiu d’un «cantar escritu a la vuelta d’un viaxe a un sitiu mui llonxanu».
«Pasémoslo en grande nos conciertos que llevamos daos esti branu. Disfrutamos muncho de facer la nuestra música en directo y tamos tamién percontentos cola rempuesta que tamos teniendo per parte del públicu», valora Marina Pangua d’una xira que los llevó a tocar dende xunu en Xixón, Uviéu, Avilés, Teberga, Samartín de Lluiña y Cadavéu. La p´roxima cita va ser el vienres 12 en Grau «nuna xornada que tan preparando con varies actividaes bien interesantes».
Suscríbite a les nuestres novedaes
