La Conseyería de Cultura, Política Llingüística y Deporte, en collaboración cola organización del alcuentru musical BIME, ta acabante d’abrir una convocatoria dirixida a artistes d’Asturies pa participar nel BIME 2026, l’alcuentru más importante de la industria musical que se celebra nel Estáu español y qu’anguaño va facese en Bilbao ente’l 27 y el 30 d’ochobre. Con esta iniciativa, la organización va escoyer una propuesta musical asturiana para ufrir una actuación curtia (showcase) énte profesionales de la industria musical, dientro de la programación de BIME Live. D’esta forma, van poder amosar el so trabayu a programadores, promotores, públicu y otros axentes del sector.
Amás, la propuesta escoyida va tener accesu a la programación de BIME PRO, l’espaciu profesional del alcuentru, nel que va poder participar n’actividaes de formación, afitar contactos y conocer les tendencies nueves de la industria musical. El plazu d’inscripción va rematar el 12 d’agostu y les bases y el formulariu pa presentar les candidatures tán disponibles na páxina web del eventu. Esta participación inclúi la producción técnica del showcase, les acreditaciones p’asistir a toles actividaes d’esti congresu y una ayuda pa contribuyir a los gastos derivaos de la participación del proyectu nel alcuentru.
Una vegada zarráu’l plazu d’inscripción, l’equipu de programación de BIME va valorar les candidatures y escoyer la propuesta participante. El Gobiernu d’Asturies nun va intervenir na valoración artística nin na elección final y el resultáu va comunicase per corréu electrónicu a toles persones y formaciones que presentaren candidatura.
BIME ye un alcuentru internacional de la Industria Musical que se fai dende 2013 en Bilbao y, dende 2022, tamién en Botogá (Colombia). Ye ún de los congresos musicales más importantes de la industria musical del Estáu español, con miles d’asistentes de tol mundu y nel qu’hai ponencies, formación, conciertos, esposiciones profesionales, alcuerdos de negociu, etc.
MUSICASTURIANA.COM participó como asisten ente 2022 y 2025 col oxetivu de medrar en conocimientos rellacionaos cola industria musical gracies a les distintes charres, conferencies y talleres; de visibilizar la música del país y crear oportunidaes de negociu con otros axentes culturales; y de conocer les polítiques musicales que tán desendolcando distintes alministraciones públiques. La edición d’esti 2026 ye la primer vez qu’Asturies va tar presente nun planu oficial y con representación nos showcase d’una propuesta musical d’equí.
Esta iniciativa súmase a la convocatoria abierta apocayá pola Conseyería pa qu’artistes y formaciones musicales asturianes puedan optar a participar en Showcase Scotland 2027, que se va celebrar en xineru del próximu añu en Glasgow. Asturies va ser la comunidá convidada na próxima edición d’esti alcuentru profesional, venceyáu al festival Celtic Connections, y la so organización va escoyer seis proyectos del nuestru país pa completar la programación oficial. Les candidatures pa esta convocatoria pueden presentase hasta’l 7 d’agostu.
Dambes acciones formen parte de la estratexa de la Conseyería de Cultura, Política Llingüística y Deporte pa favorecer la profesionalización y la promoción esterior de la música asturiana, facilitar la presencia d’artistes y bandes de la comunidá n’alcuentros especializaos y xenerar oportunidaes nueves pal sector musical asturianu.
Suscríbite a les nuestres novedaes
