Pesie a la sentencia xudicial contraria a Siente Xixón, l’Ayuntamientu de la ciudá cumplió col compromisu adquiríu y ta acabante de presentar una convocatoria nueva d’esti programa pa fomentar la música en vivo nos llocales del conceyu. Sicasí, esta aporta retayada porque namás van permitise diez actuaciones y estes nun pueden facese dos díes siguíos. Amás va haber tres periodos: el de terraces pal branu-seronda; otru na seronda-iviernu y otru en primavera. Los llocales interesaos en participar na convocatoria pa terraces, yá pueden facer la so solicitú enantes del 31 de mayu.
«En respuesta a los cambios sociales de la nuestra ciudá y de les demandes del sector de la creación artística, en concreto musical, l’Ayuntamientu de Xixón convoca’l programa Siente Xixón que se materializa nesta convocatoria pal desendolcu de la séptima edición del proyectu destináu a la búsqueda de soluciones a la problemática de les actuaciones en vivo en Xixón y da-y amparu a esti tipu d’actividaes». Con estes pallabres el Conceyu Xixón abre una convocatoria nueva como respuesta la denuncia ganada xudicialmente pola asociación Asturias de Noche contra esta iniciativa y a la respuesta d’un sector musical agrupáu al rodiu de la plataforma Unidos por la Cultura en Asturias.
D’esta manera, vuelve a haber edición 2025/2026 de Siente Xixón, anque adaptada a la llexislación. Son dos convocatories estremaes qu’abarquen terraces al aire llibre y establecimientos culturales. La primer convocatoria, ‘Siente Xixón Terrazas‘, va desendolcase ente’l 1 de xunu y el 15 d’ochobre de 2025 y va centrase n’actuaciones artístiques de pequeñu formatu en terraces y merenderos al aire llibre, siempre y cuando la fonte sonora s’ubique al menos a 40 metros de viviendes o residencies de tercera edá. Los llocales interesaos pueden presentar les sos solicitúes a traviés de la web del Ayuntamientu hasta’l 31 de mayu, debiendo cumplir colos requisitos d’aforu, seguridá y normatives acústiques.
Amás de ‘Siente Xixón Terrazas’, l’Ayuntamientu tamién presentó la séptima edición del programa ‘clásicu’ de Siente Xixón. Esti va tener dos periodos de programación: del 3 d’ochobre de 2025 al 11 de xineru de 2026; y del 27 de marzu de 2026 al 31 de mayu de 2026. Esta convocatoria ta empobinada a establecimientos de proximidá con una programación cultural estable, va desixise un control acústicu mayor y van sancionase los incumplimientos de les bases y normatives de convivencia ciudadana.
Los plazos de presentación de solicitúes son del 15 de xunu al 29 d’agostu pal periodu de seronda-iviernu y del 15 de xineru al 26 de febreru pal de primavera. Ente los criterios de valoración ta la trayectoria cultural del llocal; la calidá interés y viabilidá del proyectu; la consecusión de los oxetivos del programa y la difusión.
Siente Xixón ye una iniciativa del Ayuntamientu de Xixón que facilita la programación de música en directo y otres manifestaciones artístiques, faciendo por llimitar los efectos negativos de la Llei 8/2002, de 21 d’ochobre, d’Espectáculos Públicos y Actividaes Recreatives. Lleva desendolcándose exitosamente dende 2018 y, tres de l’amenaza a la edición d’esti añu, vuelve a desendolcase adaptándose a la sentencia xudicial desfavorable.
Suscríbite a les nuestres novedaes
