La electrónica de raigañu protagoniza los X Alcuentros de Músiques Asturianes de Xixón

Esta mañana presentóse en rueda de prensa nel Centru Cultural Antiguu Institutu de Xixón los X Alcuentros de Músiques Asturianes, xornaes que dende va una década entama la Fundación Municipal d’Educación, Cultura y Universidá Popular del Conceyu a traviés de la Oficina Municipal de la Llingua y el Taller de Músicos. El Director de la FMECyUP, Miguel Barrero, y Eduardo G. Salueña del Taller de Músicos presentaron una programación qu’inclúi, del 22 al 25 de payares, les actuaciones de Fruela 757, Tasio, Bimenes Underprau y Llevólu’l Sumiciu, amás d’una collaboración audiovisual de Tever.

La incorporación de les nueves tecnoloxíes, l’usu de nuevos formatos y un emplazamientu nuevu, el Muséu del Ferrocarril de Xixón, son les tres novedaes más destacaes d’estos alcuentros musicales en 2022. D’esta manera, per primer vez la canal de YouTube del Taller de Músicos de Xixón va xugar un papel cimeru gracies a la publicación nél de tres videos fechos por Tever pa esta ocasión nos que’l gaiteru, investigador y divulgador musical va tratar aspectos venceyaos coles músiques de raigañu y la esperimentación electrónica. Cuestiones como los instrumentos, los estilos y la multiplicidá d’escenes musicales dientro y fuera d’Asturies, son dalgunos de los conteníos que van tar presentes nestos videos.

Amás de los videos, la música en directo va completar el programa de los X Alcuentros de Músiques Asturianes. El martes 22 de payares actúa Fruela 757, ún de los pioneros n’amestar música popular asturiana con soníos de la música urbana del sieglu XXI como’l hiphop, el reggaeton o la electrónica. Pal miércoles 23 ye Tasio -alter ego de Dudu García, músicu tamién en proyectos como El Velcro o Cuchu- quien va tocar nel andén principal del Muséu del Ferrocarril. Col so proyectu, garra cantares y pieces de la tradición asturiana pa igualos con low whistle, clarinete, voz, caxa de ritmos y producciones con instrumentos virtuales. El resultáu ye un soníu qu’axunta tradición con estilos de música contemporánea como’l drum&bass o hardtek.

El hiphop n’asturianu, la electrónica y les lletres combatives de Bimenes Underprau dan forma al conciertu del xueves 24 de payares. El proyectu del músicu y escritor Pablo Martínez Testa va presentar en directo per primer vez Fesoria y Garabatu, l’álbum qu’asoleyó en mayu d’esti añu. Per último, Llevólu’l Sumiciu zarren los alcuentros cola so propuesta audiovisual nel que la música del país renuévase gracies a la revisión que’l dúu fai d’ella fusionándolos con ritmos afrollatinos y electrónicos; too ello acompañáu d’unes proyecciones que s’inspiren n’imaxes d’archivu que reflexen el costumismu de los años 70 y 80 y el patrimoniu mineru y industrial.

ElectronicAst

«Con esti ciclu pequeñín queremos poner l’acentu nes tendencies sonores más de recién, eses nes que les músiques d’ayeri y d’anguaño van de la mano», comenten dende l’área de Cultura del Ayuntamientu de Xixón. D’esta manera, afirmen que «cola denomación ElectronicAst xúntense, na busca d’un llinguax unificáu, la esperimentación electrónica y la identidá musical asturiana entendida d’una forma mui amplia, buscando vasos comunicantes ente públicos de distintes xeneraciones y apelando a la mente abierta». Asina ye como «tonada combinada con cumbia o reguetón; o hiphop mecíu con electrónica y lletres reivindicatives n’asturianu o folktrónica», son les propuestes que van poder sentise en directo nel Muséu del Ferrocarril del 22 al 25 de payares, a les 20h y con entrada de baldre,

*Na semeya, d’izquierda a derecha, Eduardo G. Salueña del Taller de Músicos; Miguel Barrero, Director de la FMECyUP, María Xosé Rodríguez, responsable de la Oficina Municipal de la Llingua y Fernando Oyágüez del Taller de Músicos

Mercar discos d’electrónica y rap na tienda online