El VIII Filandón y la Selmana Cultural XX Aniversariu enllenen la Comarca d’Avilés de cultura de raigañu

El calendariu d’eventos d’esta segunda quincena de payares abre con dos xornaes bien destacaes na Comarca d’Avilés. Per un llau, hasta’l sábadu 19 de payares el barriu de Llaranes, n’Avilés, va acoyer el VIII Filandón nel qu’amás de delles actividaes rellacionaes col traxe’l país va haber el sábadu Tarde en Danza colos conciertos de 6 Riales, L’Andecha Turcipié y les pandereteres d’Escontra’l Raigañu. Per otru llau, el Valey Centru Cultural de Castrillón cellebra ente’l 21 y el 26 de payares la Selmana Cultural XX Aniversariu na que, ente otros eventos, va haber actuaciones de Dani García de la Cuesta, Tradicionando, Felpeyu y la Banda Gaites de Castrillón, organizadora del programa.

La charra Artificiales y Sintéticas. Una antropoloxía del filu con Fe Santoveña abrió esti llunes 14 el VII Filandón, xornaes qu’entama’l grupu folclóricu Escontra’l Raigañu. La programación continúa cola visita a l’Aula Didáctica de Cultura Popular Asturiana Formes de Vivir, Maneres de Vistir, asitiada na Plaza Mayor d’Avilés, que va poder facese’l martes 15 y xueves 17 a les 19.30. Per último, el Centru Sociocultural de Llanares acueye’l sábadu 19 a les 19h la charra de Paz González Mesa Artesanía textil. Una forma de vida nel sieglu XXI y a les 20h la Tarde en Danza col tríu de música tradicional 6 Riales, la bandina L’Andecha Turcipié y les pandereteres d’Escontra’l Raigañu.

Per otru llau, la Banda Gaites de Castrillón festexa dos décades n’activo entamando la Selmana Cultural XX Aniversariu. El Valey Centru Cultural de Piedrasblancas va ser l’escenariu d’estes xornaes qu’entamen el vienres 18 cola inauguración nel Foyer del Teatru d’una esposición del XX Aniversariu que va poder visitase hasta’l domingu 27. La sala polivalente del Valey tamién va acoyer ente selmana delles actividaes: un conciertu participativu de Dani García de la Cuesta -llunes 21 a les 19.30h-; una charra-taller de Fe Santoveña sobre’l traxe tradicional asturianu -martes 22 a les 19.30h- y un taller de música y bailles tradicionales de Bretaña impartíu por Stéphane Riou y Patrice Flammer.

Tres conciertos

Pal fin de selmana’l Valey Teatru acueye tres actuaciones distintes gratuites a les 20h. El xueves 24 va ser la del Grupu Tradicionando col so espectáculu de música, baille y cantares populares; el vienres 25 la del míticu grupu folk Felpeyu; y el sábadu 26 la Banda Gaites de Castrillón va dar un conciertu especial acompañada de varios collacios y collacies.

*Na semeya’l grupu 6 Riales.

Mercar discos de gaita y pandereta na tienda online