Dempués de delles actuaciones nel Día’l Traxe’l País, la Seronda en Danza y la Xuntanza la Navidá en Grau, y participar nel Conciertu de Músicos Quirosanos organizáu pola BG Teixo-Manolo Quirós en Bárzana, l’Asociación de Folclore La Flor de Grau entama la so presentación oficial na Capiella Los Dolores moscona a les 19:30h del próximu vienres 31 de xineru.
La Flor de Grau naz nel branu de 2024 col envís d’esparder el folclore asturianu nel so conceyu. Dende ochobre, amuesa’l so enfotu pedagóxicu coles clases de pandereta y baille tradicional qu’imparte Paz Mesa selmanalmente en La Panera, amás d’otres formaciones como’l taller d’averamientu a la gaita asturiana que punxo Luis Pola n’avientu.
Ún de los oxetivos del colectivu ye’l de trespasar l’ámbitu de la percusión tradicional y el baille, queriendo deprender y intercambiar esperiencies con otres agrupaciones dedicaes al folclore, l’asturianada y la música coral. Poro, inviten a toles asociaciones y formaciones del conceyu Grau a averase a la so presentación d’esti vienres 31 na Capiella Los Dolores, na que collabora la Conceyalía de Cultura.
Suscríbite a les nuestres novedaes
