La Banda Gaites Camín de Fierro, una de les más ambicioses y característiques de la escena asturiana, dio anuncia va delles selmanes de que Balbino Menéndez Suárez y Arsenio Ruiz González dexaben la dirección y daben el relevu a una xeneración más moza con Álvaro Cueto y Hernán Iglesias. Nestos más de venti años dende que Balbino Menéndez fundó l’agrupación ente los conceyos de Proaza, Santo Adriano y Teberga, como él mesmu recuerda, embarcáronse n’actuaciones pel territoriu asturianu, una xira per Arxentina (2013) y la participación en dellos festivales gallegos y franceses, destacando, por poner, la so presencia nel Festival Intercélticu de Lorient en 2014 y 2022. Dambos dexen, amás, una buelga importante no musical, implicaos na formación y evolución de toles persones qu’apurrieron el so tiempu y llabor al proyectu, un fechu que s’espeya nos dos discos que grabaron mientres estos años: 10 años nel camín y Rock & Fierro.
Balbino Menéndez, qu’amás foi fundador de la banda en 2002, confiesa que, dempués de 22 años al cargu, tocaba descansar y dexar el proyectu en manes de xente mozo «con esa ilusión necesaria para lliderar y tirar p’alantre por una banda que va a contar con unes cabeces visibles de primer nivel, pero ensin olvidar que non detrás, sinon al llau, van contar con unos componentes con sabiduría y esperiencia, con convicción y sentíu de pertenencia, y tamién con puxu y ambición». Una agrupación, en definitiva, que, como comenta Arsenio, «quedó perfectamente preparada, mesmo a nivel d’infraestructura y materiales, que na formación d’un repertoriu con partitures y arreglos, y cola capacidá interpretativa de defendelos como para que pudieren continuar el so propiu camín». A Hernán y Álvaro toca-yos, precisamente, siguir dando forma a esa sienda, «ciclos que se cumplen», diz Arsenio, qu’añade «güei Camín tien una banda moza que pue trazar nuevos caminos y estilos de la mano de les sos directores nuevos».
Camín de Fierro, según Balbino, vivió tres etapes baxo la so dirección, que coinciden amás coles tres persones que lu acompañaron como responsables de la percusión: «un nacimientu y fundación con José Manuel Fernández García «Camaría» col qu’afitamos les mimbres alministratives, les dinámiques d’ensayu, y sobre too los valores y oxetivos que nos moveríen siempre; una consolidación xunto a Abel Álvarez Álvarez, onde entamamos a «creyénoslo», participar en festivales y asumir retos musicales más ambiciosos; y un espoxigue con Arsenio Ruiz González onde lo musical tomó’l centru y onde enfrentamos los proyectos musicales más ambiciosos y de más ésitu de la banda». Esti percorríu musical de bayura foi al empar del equipu humanu, una xera pa la que, confiesa, intentó «ser xustu, motivar, creyer, conciliar, cuidar, sumar».
La xera que tienen per delantre Álvaro Cueto y Hernán Iglesias ye abegosa a la par que gratificante. Garren con responsabilidá un testigu bultable y, anque yá se conocíen ente ellos y lleven yá tiempu tocando y conociendo dende dientro de Camín de Fierro, nun yeren miembros enantes del relevu. Álvaro almite que la primer parte del llabor ye la d’entendese y adaptase, esi facer equipu del que falaben Balbino y Arsenio. «Esto paeznos yá un retu pa entamar. Conocer el repertoriu que yá tien la banda, la so manera de furrular mesmo organizativamente que no musical -ensayos, actuaciones, instrumentos, etc- y, a partir d’ehí, aportar la nuesa firma a la bien fonda influyencia que dexaron na banda y que por supuestu seguirán teniendo». Anguaño tán trabayando sobre esi repertoriu que los integrantes yá tocaron, «conociéndolu, escoyéndolu y consensuado cola xente les «vueltes» que queremos da-y».
Una de les iniciatives más llamaderes mientres el períodu de dirección de Balbino y Arsenio foi la grabación del discu Rock&Fierro y los conciertos posteriores amosando’l resultáu, un repertoriu nel que los instrumentos tradicionales suenen a comuña con una banda de rock, con sonoridaes hasta’l momentu poco comunes nel mundu de les bandes de gaites asturianes. El llabor foi difícil: convencer a los músicos, encargar les lletres, componer les melodíes y los arreglos de percusión, escoyer les harmoníes, topar un vocalista qu’unificara l’estilu de los autores de los cantares… De toes maneres, dambos recuérdenlo con ciñu y reivindiquen el valir del resultáu y d’un procesu nel qu’hebo que «tomar riesgos y facer una propuesta que resultara distinta», desplica Arsenio. A la fin, poner en marcha el motor que, según Balbino, mueva la banda, la ilusión. Por eso defende que «siempre hai que tener un retu y un oxetivu; un proyectu que pue ser grande o pequeñu, ambiciosu o humilde», pero nel qu’hai qu’enfotase.
Arsenio Ruiz afonda na cuestión de la cohesión de la banda y del cuidáu del grupu humanu, consciente de qu’un ambiente agradable y de crecimientu ye imprescindible pa que les formaciones funcionen y caltengan la responsabilidá y ilusión, porque la mayor parte de la xente que les integra nun se dediquen profesionalmente a ello, pero participen con compromisu, invirtiendo’l so tiempu llibre. Reflexona al rodiu d’ello recordando un tiempu nel que «yera común que los directores diesen caña, pasando de lo musical a lo personal y faltando el respetu». Poro, afirma que «en Camín de Fierro siempre creyimos que crear un espaciu de respetu yera l’únicu mou posible de trabayar con xóvenes aficionaos; siempre antepusimos lo humano a cualesquier otra prioridá». El resultáu de la xestión de dambos nesi sen, sicasí, paez que ye satisfactoriu, y lleven con arguyu’l crecimientu musical del grupu.
Álvaro Cueto, pela so parte, yá tien esperiencia nel tema -lleva dirixendo la Banda Gaites Ribeseya cuasique 14 años-, anque comenta que’l llabor siempre ye diferente: «La xente podría pensar qu’una banda gaites ye «sota, caballu y rei», pero nin muncho menos. La propia xente yá fai diferente les agrupaciones, y ye normal». La xera que tien énte él, diz, requier d’un procesu d’adaptación y de conocimientu al detalle de los instrumentos y los músicos, «topando puntos en común y, cuando nun los hai, intentando buscar el meyor camín». Hernán y él tienen clares les perspectives presentes y futures na dirección de Camín de Fierro, «estabilizase, adaptase, facer escuela pa que la banda tenga futuru y a partir d’ehí, con esta base inevitable, mirar a proyectos mayores como los que yá tuvieron ente manes».
Suscríbite a les nuestres novedaes
