El grupu folclóricu L’Artusu de Figareo, la Banda de Música de Mieres y l’Ochote Mieres del Camín dan forma a L’Artusu Sinfónicu, espectáculu qu’axunta a 90 músicos y danzantes y que va interpretase’l 30 de mayu a les 19h nel Espaciu Cultural Pozu San José de Turón. Pa conocer meyor esta propuesta y el llabor de L’Artusu falamos con Carlos Álvarez, director artísticu -xunto a Laura Prieto- y impulsor d’una idea que tien dirección musical d’Ángeles Nespral -directora del GB L’Artusu- y de Jesús Alberto Alonso Pacheco, director de la banda mierense.
¿Qué ye L’Artusu Sinfónicu?
Ya un amiestu de lo sinfónico d’una banda música cola música y el baille d’un grupu tradicional asturianu, onde aprovechamos pa facer un homenaxe a la Mina.
¿Cuándo, cómo y por qué naz esta idea?
Nel añu 2025 surdió una collaboración ente la Banda Música de Mieres y el Grupu Folclóricu L’Artusu de Figareo. Foi nel conciertu de Primavera d’esti mesmu añu de la banda, onde se desendolcó esta primera collaboración. El grupu de Pandereteres de L’Artusu encabezáu por Angeles Nespral tocó a dúu cola banda dirixía pol maestru Jesús Alberto Alonso Pacheco. Temes como ‘Valle de Naredo’ o ‘La Fonte les xanes’ sonaron nel Auditoriu Teodoro Cuesta de Mieres con soníos sinfónicos y panderetes, daqué qu’encantó a los asistentes.
Dempués d’esta primer esperiencia, viendo que saliera perbién y el públicu quedara con ganes de más, decidimos siguir collaborando subiendo un pasu más y preparando tamién bailles. Asina llegó la fiesta d’Uxo de San José Obreru’l 1 de Mayu de 2025 onde hubo música y baille; amás de Les Pandereteres de L´Artusu tamién tuvieron cabida delles pareyes de baille acompañando a la banda y les panderetes.
«Lo más guapo va ser el poder esfrutar de los dos grupos xuntos nel escenariu y too ello arreglao col encantu del llugar y una hestoria, un suañu, que nun va dexar indiferente a naide. Nun queremos adelantar más…»
¿Qué va poder vese nel espectáculu?
Nel espectáculu van poder vese trés bloques estremaos, onde’l públicu va poder esfrutar de dalguna pieza del grupu de baille L’Artusu y de la Banda de Música de Mieres xuntu col Ochote de Mieres del Camín. Pero lo más guapo va ser el poder esfrutar de los dos grupos xuntos nel escenariu y too ello arreglao col encantu del llugar y una hestoria, un suañu, que nun va dexar indiferente a naide. Nun queremos adelantar más…
Del repertoriu que vais interpretar, ¿hai pieces de composición nueva o son too igües de pieces tradicionales?
La mayoría de les pieces son igües de pieces tradicionales, pero tamién contamos con alguna pieza nueva como ye ‘La Xota d’Ajo’.
«Enriba l’escenariu va haber muncha xente, concretamente 90 persones… Equí’l backstage nun esiste, pero ehí ta tamién la maxa, na escenografía del escenariu, que vamos ser nós mesmos»
Van andechar con vos la Banda de Música de Mieres y l’Ochote Mieres del Camín. ¿Cuántes persones van vese enriba l’escenariu, qué papel xuega cada parte implicada y cómo ta siendo la esperiencia de preparalo?
Enriba l’escenariu va haber muncha xente, concretamente 90 persones… nun ta siendo fácil, nun vamos actuar nun teatru onde podemos entrar y salir. Equí’l backstage nun esiste, pero ehí ta tamién la maxa, na escenografía del escenariu, que vamos ser nós mesmos.
Amás del propiu espectáculu, ye mui llamativu l’espaciu onde va desendolcase: el Pozu San José de Turón. ¿Por qué escoyistis esta ubicación?
Queremos dir más allá y dexar a un llau los auditorios y llugares onde actuamos cualesquier de les agrupaciones de normal y llevar esti espectáculu a un entornu mineru. Escuchar y ver pieces como ‘El Valle de Naredo’ o ‘La Muñeira de Carcarosa’ debaxo’l castillete del Pozu San José va tar mui guapo.
«Escuchar y ver pieces como ‘El Valle de Naredo’ o ‘La Muñeira de Carcarosa’ debaxo’l castillete del Pozu San José va tar mui guapo. Tamién van sonar otres de composición nueva como ‘La Xota d’Ajo’»
Esti espectáculu aporta dempués del Artusina Fest qu’entamastis en payares. Col tiempu pasáu, ¿podéis recordar en qué consistió y qué balance facéis de la esperiencia?
L’Artusina Fest foi una vuelta de fueya a los festivales de música tradicional. Queríemos sorprender al publicu faciendo daqué distinto, nun faer un festival con una pieza tres d’otra. Buscamos un filo conductor, que foi’l teatru y buscamos fundir más estilos musicales ensin perder la esencia del folclor tradicional. La respuesta del públicu foi bien bona, pa nós foi una esperiencia bien risondera y satisfactoria; y yá ta en marcha la segunda edición.
L’Artusina Fest y L’Artusu Sinfónicu espeyen que tais nun momentu de muncha creación, actividá y anovación. ¿Veislo de la mesma manera? ¿Cuál ye la causa d’esto?
La causa nun ye otra que nun queremos enfotanos en faer siempre lo mesmo. Los grupos de baille tenemos la obligación de dar a conocer esto a la xente y anguaño competimos con coses muncho más atractives, polo qu’hai qu’anovar. Somos un grupu con muncha xente xoven, d’ellos salió la idea de L’Artusina Fest, de la xente mozo del grupu. Tamién tenemos xente bien creativo que día ente día inventa coses nueves pa llevar lo nueso al públicu d’una manera distinta a la que tán avezaos.
«Agora mesmu L’Artusu somos cuasi 60 componentes, pero lo más guapo ye ver que tenemos xente mozo, xente non tan mozo y xente que lleva ehí dende que se creó’l grupu allá por 1988. Lo que más nos presta ye saber qu’hai cantera y que’l grupu va siguir palantre»
Too ello pa un grupu de baille con dellos años d’actividá al costazu y coles dificultaes qu’implica caltener güei día a la xente activo. ¿Qué balance facéis del llabor de L’Artusu y del momentu nel que vos alcontráis?
Nesto del folclore, como tou, hai momentos más altos y momentos más baxos. Agora mesmu L’Artusu somos cuasi 60 componentes, pero lo más guapo ye ver que tenemos xente mozo, xente non tan mozo y xente que lleva ehí dende que se creó’l grupu allá por 1988. Lo que más nos presta ye saber qu’hai cantera y que’l grupu va siguir palantre. Agora mesmu tamos nun momentu mui buenu.
Espectáculos como’l vuestru, como’l conciertu sinfónicu de Skanda, les obres 13 Reyes cola participación del Atenéu Musical de Mieres, o los Diarios d’Ampudia de Prau Llerón, amuesen el dinamismu que ta habiendo en Mieres dientro del ámbitu de la música tradicional. ¿Cómo valoráis el momentu, a qué creeis que se debe y recordáis qu’enantes pasara daqué asemeyao?
Pues, evidentemente, valoramoslo bien positivamente. En Mieres tenemos talentu enforma, munches agrupaciones que faen una llabor envidiable con esti tipu d’espectáculos. Y débese precisamente a lo qu’enantes nos referíemos; nun queremos cayer na rutina, los grupos queremos faer coses distintes pa sorprender al públicu y averalos entá más al folclore.
«En Mieres tenemos talentu enforma, munches agrupaciones que faen una llabor envidiable con esti tipu d’espectáculos. Y débese a nun queremos cayer na rutina, los grupos queremos faer coses distintes pa sorprender al públicu y averalos entá más al folclore»
Precisamente esti llabor nun tendría xacíu ensin la respuesta del públicu. ¿Qué espectatives tenéis pal espectáculu de L’Artusu Sinfónicu?
Tamos seguros de que’l públicu va responder y nun se van arrepentir de venir. Yá tenemos a muncha xente preguntando si hai entraes, si precisen acutar… L’espectáculu ye de baldre, vamos tener aforu de sielles, pero tamién ye un espaciu onde la obra, que va durar unos 70-80 minutos, puede vese de pie.
Suscríbite a les nuestres novedaes
