El pasáu xueves La Tarrancha anunció a traviés de les sos redes sociales un cambiu na formación. Dempués d’una montonera años, el multiinstrumentista Edu Llosa -y tamién componente d’Alienda y Abéu, ente otros proyectos- tien que dexar de ser el batería del grupu mecigayu-ska pola dificultá de compatibilizar toles sos xeres nel mundu de la música. El sustitutu ye Dani Valdés, que yá tocó en dellos conciertos con esta formación.
«Hasta agora, Dani tien echaonos una mano como tarrancheru suplente delles veces. Lleva tocando na Banda Gaites Villaviciosa El Gaitero dende 2012, d’ehí empezó a tocar la bateria de forma autodidacta, pa dempués arrancar a pisar escenarios con grupos como Staytons, Alienda o La Mueska. Aparte músicu, ye técnicu de soníu«, publicó La Tarrancha nel so Facebook. Amás, n’Instagram asoleyaron un videu col so particular humor «tarrancheru» nel qu’Edu Llosa céde-y les baquetes, les llaves y «la ferramienta principal», una escoba pa barrer el llocal d’ensayu.
Na semeya, Dani Valdés tocando con La Tarrancha nel Rockvera Fest con Dani Valdés como batería.
Suscríbite a les nuestres novedaes
