Esti vienres 7 de payares a les 19h tien llugar nel Teatru Vital Aza de La Pola L.lena la gala final del XVII Premiu Camaretá al Meyor Cantar, l’únicu premiu institucional qu’esiste anguaño pa da-y reconocimientu a la música contemporánea fecha n’asturianu o gallego-asturianu. Lïbre con ‘L’ablugada‘, Herbamora con ‘Eclipse total‘, Ferla Megía con ‘Xatu‘ y Héctor Braga con ‘Valiente‘, son los cuatro proyectos y cantares nominaos nesta edición. Dende MUSICASTURIANA.COM vamos falar esta selmana cada día con ún de los artistes nominaos p’afondar na so participación nel gallardón.
Siguimos el cuestionariu con Herbamora, el grupu que revolucionó la pandereta asturiana. La formación nació en 2003, cuando seis muyeres percusionistes y cantantes vinculaes a la cultura tradicional xuniéronse con un oxetivu: dar un aire nuevu al mundu de la pandereta y sacarla de los estereotipos nos que taba arrequexada. Asina ye como s’estrenaron con ¡Sali, L.luna!; en 2013 espublizaron N’Acústicu y en 2024, el so tercer trabayu 286 Llunes demostraba por qué siguen siendo les revolucionaries de la pandereta, trayendo al presente lo que cantaban les güeles asturianes, destacando la importancia del amor propio, l’empoderamientu femenín y el poder de la sororidá nuna sociedá individualista y heteropatriarcal.
¿Qué supón pa vós la nominación nesti premiu y qué supondría ganalu?
Pa nós, esta nominación ye un arguyu y una alegría enorme. Yá tuvimos la suerte de ganar la segunda edición del Camaretá y volver a tar ente les finalistes fainos sentir que’l nuestru trabayu sigue teniendo sentíu y llega a la xente. Ganar otra vegada sería un emburrión prestosu pa siguir creando y calteniendo viva la música asturiana.
¿Por qué escoyistis esti cantar pa concursar?
Escoyimos ‘Eclipse Total’ porque ye l’únicu cantar del nuestru últimu discu 286 Llunes que tien una lletra de composición propia, tal como pide’l certame. Amás, representa mui bien la nuestra esencia: la fusión ente tradición y modernidá.
¿Tenéis daqué especial preparao pa l’actuación del domingu?
Sí. Queremos ofrecer una puesta n’escena cuidada y emotiva, pa que’l públicu nun escuche’l cantar namás, sinón que la sienta con nós. Habrá delles sorpreses.
Suscríbite a les nuestres novedaes
