La gaita protagoniza la nueva edición de “Música y Tradición” el 9 y 10 de xunu en Trabáu

Vuelve Música y Tradición l’eventu dedicáu a la cultura tradicional del país qu’organiza La Guarida del Cunqueiru en Trabáu, conceyu de Degaña. Tres del éxitu de la edición del añu pasáu, na que s’inauguró la escultura A Panderetúa di Trabáu y fixéronse delles actividaes alredor de la pandereta, esti añu la gaita ye la protagonista cola entrega d’A Ruxideira d’Ouru a Xuacu Amieva y un alderique abiertu alredor d’esti instrumentu. Tamién van actuar D’Urria y va haber filandón con muncha música y baille. Too ello de baldre -previa reserva- los díes 9 y 10 de xunu.

El vienres 9 de xunu a les 22.30h entama la xornada con una actuación, promovida pola Espacio Tormaleo, de D’Urria, grupu de L.laciana que comparte milenta rasgos culturales col suroccidente asturianu. Llueu d’esi aperitivu, el sábadu 10 a les 17.30h ye la presentación y inauguración de Música y Tradición y a les 18h entrégase A Ruxideira d’Ouru a Xuacu Amieva. «Ye un paisanu que lleva munchos años poniendo en valor un instrumentu tan icónicu como ye la gaita y siendo mayestru de mayestros n’Asturies», comenten dende La Guarida del Cunqueiru p’argumentar la distinción a esta persona imprescindible de la cultura asturiana.

Pa les 18.30h va haber un concechu entituláu La gaita: de los chigres a los escenarios nel qu’intervienen el propiu Amieva, Carlos Fernández, Gaitas Linde, Cesar Gracia y Cristian Pastrana; amás de cualquier persona que tenga interés n’ello, porque la participación nesti alderique ye abierta. Y llueu d’esto «Filandón hasta que’l cuerpu aguante», con baille, pandereta, gaita, tambor, gastronomía y folixa en xeneral. L’eventu ye de baldre, pero pa poder asistir hai que s’apuntar nel teléfonu 689 755 836.

Trabáu, paraísu folk

Trabáu, nel conceyu de Degaña, ye una de les meques de la cultura tradicional asturiana. Tierra de cunqueiros y llugar d’orixe de pandereteres fundamentales dientro de la música asturiana como la finada María Trabáu; esti pueblu ye tou un símbolu nel caltenimientu de la llingua y la cultura autóctones. Por eso nun ye casualidá que nel s’asitie la escultura A Panderetúa di Trabáu, que ye’l mayor monumentu n’homenaxe a la pandereta.