Trabáu, nel conceyu de Degaña, ye una de les meques de la cultura tradicional asturiana. Tierra de cunqueiros y llugar d’orixe de pandereteres fundamentales dientro de la música asturiana como la finada María Trabáu; esti pueblu ye tou un símbolu nel caltenimientu de la llingua y la cultura autóctones. Por eso nun ye casualidá que’l 11 de xunu vaya acoyer la inauguración de la escultura A Panderetúa di Trabáu, que va ser el mayor monumentu n’homenaxe a la pandereta. Amás d’esto va haber na Guarida del Cunqueiru actividaes tola tarde y nueche alredor d’esti instrumentu y de la cultura de raigañu.
L’eventu Música y tradición na Guarida del Cunqueiru entama’l vienres 11 a les 17h cola inauguración de la mentada escultura. Llueu, a les 17.30h, Rodrigo Cuevas va recibir el galardón A Ruxideira d’Ouru, un nuevu reconocimientu na trayectoria d’esti axitador folclóricu. Él, xunto a Mariluz del Corralín, Rosa Cunqueira, Ambás ya Ramsés y Aurora Pazos van dar a les 18h el Concechu de participación abierta La pandereta, instrumentu y símbolu cultural. P’acabar, a les 19h, arranca’l filandón «hasta que’l cuerpu aguante» nel que va haber baille, música, comida y bebida pal disfrute de tola xente que participe nesti alcuentru entamáu pola Guarida del Cunqueiru.
L’eventu ye gratuitu pero pa poder asistir hai qu’acutar nel teléfonu 689755836, nel qu’informen tamién de la disponibilidá de zona d’acampada y espaciu pa furgonetes y caravanes. La espicha tamién ye de baldre y dende la organización namás piden que quien participe lleve bebida pa compartir nel filandón. Amás, estos últimos díes enantes qu’arranque l’eventu, La Guarida del Cunqueiru ta sorteando una pandereta ente tola xente que los siga n’Instagram.
Suscríbite a les nuestres novedaes
