Baxel asoleyen “Tebrandi”, una reellaboración del Corri-Corri
Va unes selmanes Baxel llanzaben nes plataformes dixitales l’himnu que compuxeron pal Rompiente F.S. Agora’l dúu formáu polos componentes de Corquiéu Rigu Suárez y Paul Balmori regresa con un cantar nuevu. Trátase de “Tebrandi” que ye’l nome d’una braña d’Asiegu (Cabrales). «Ficimos una reellaboración del perconociu Corri-Corrí de Cabrales amestáu a una composición mía en ritmu coxu 7/8», desplica Rigu Suárez sobre esta pieza na qu’él mesmu fizo los arreglos melódicos pa tres flautes y el so compañeru Paul fai la voz principal y los arreglos de bouzuki.
“Tebrandi” grabóse nos Tutu Estudios de Corvera cola producción de Sergio Rodríguez y nél participa Richard García, collaborador habitual de la banda que fizo los arreglos de teclaos. Con esta pieza nueva Baxel siguen el so camín de reellaborar la música popular asturiana; el so primer álbum El Cantar del Simpatías tuvo dedicáu a los cantares de Ribeseya y agora espárdense a otru conceyu del Oriente’l país bien rico musicalmente, Cabrales.
