Les asociaciones culturales dedicaes a la tradición d’Asturies foron y son un motor pal caltenimientu del patrimoniu inmaterial que son, ente otres manifestaciones, la música y el baille. L’Andecha Folclor d’Uviéu y l’Asociación Cultural Escontra’l Raigañu proponen dende güei hasta’l sábadu dos cites imprescindibles pa col baille a lo llixero y el folclor del oriente. Amás, el Muséu del Pueblu d’Asturies ta acabante d’editar un volume doble sobre les dances de palos nel suroccidente’l país.
L’Andecha Folclor d’Uviéu lleva más de tres décades puxando pola investigación etnográfica con delles publicaciones que rexistren teoríes, partitures y amueses del baille’l país. Una década dempués de l’últimu volume de la so colección dedicada al baille a lo suelto, ponen el ramu con El Cancioneru l’Andecha: Lo llixero n’Asturies, un llibru resultáu d’un trabayu coordináu por María Isabel Álvarez. La presentación ye güei, xueves 26 de setiembre, a les 19h na Biblioteca Pública d’Asturies Ramón Pérez d’Ayala, n’Uviéu. Nella van intervenir, amás de María Isabel Álvarez, Octavio Trapiella -miembru de l’Andecha- y Balbino Menéndez -en representación de los autores del analís musical y trescripción de les partitures-.
Per otru llau, l’Asociación Cultural Escontra’l Raigañu (Avilés) ye tamién exemplu del compromisu pa cola tresmisión de la nuestra cultura. Esti fin de selmana entama una edición más de les Xornaes d’estudiu qu’organicen na so Aula didáutica de cultura popular asturiana col títulu «El folclor nel Oriente. Pasáu y presente«. Nesta ocasión, dempués de delles xornaes dedicaes a los sones d’arriba (2018, 2019) y al folclor vaqueiro (2023), l’asociación va cuntar coles persones con conocencia más fonda de la tradición del oriente del país. Ente elles, Fe Santoveña, Santi Galguera, Yolanda Cerra y Ramsés Ilesies, que van afondar en temes como’l traxe, el repertoriu de bailles y dances, la práutica de la xota y la gallegada, y los acompañamientos de percusión. L’eventu conforma una amuesa más del compromisu d’Escontra’l Raigañu pa col estudiu del orixe, hestoria y evolución de la cultura tradicional asturiana. La programación completa pue consultase equí:
Amás d’estes dos cites, el Muséu del Pueblu d’Asturies, cola collaboración de la Rede de Museos Etnográficos d’Asturies (Conseyería de Cultura, Política Llingüística y Deporte), editó apocayá’l llibru La danza. Danzas de palos del suroccidente de Asturias y el valle de Forniella (León), 2 vol., de Naciu’i Riguilón (Mual, Cangas del Narcea, 1962). Les dances de palos son una seña d’identidá de munchos pueblos del suroccidente d’Asturies y el valle de Forniella (Llion). Los exemplares asturianos, poco estudiaos hasta la fecha, pertenecen a los conceyos de Cangas del Narcea, Ibias y Degaña. L’autor d’estos dos volumes lleva más de venti años recopilando datos históricos y etnográficos d’elles y de les fiestes onde se baillaben mediante trabayu de campu, entrevistes a danzantes, consultes a archivos parroquiales y particulares, y, con mayor enfotu, recopilando una colección de semeyes que documenta la so evolución. El Muséu del Pueblu d’Asturies edita esta obra col fin de documentar, conservar y difundir esta parte del patrimoniu cultural inmaterial d’Asturies. Yá ta disponible la versión en papel y, próximamente, nel repositoriu de los museos de Xixón.
Suscríbite a les nuestres novedaes
