Yá ta a la venta en musicasturiana.com y en llibreríes Da-yos caña. El tiempu y el contestu d’una banda de Rock Astur, la obra cola que Xune Elipe algamó’l II Premiu «Yolanda Huergo», convocáu pola Asociación Grana, entidá que fai alcordanza de l’activista xixonesa finada hai 6 años. Nel llibru tán presentes, a lo llargo de 140 páxines, campos lliterarios y temáticos estremaos: historia, política, música o biografía danse la mano nun testu que se centra nes circunstancies y socedíos más importantes a nivel asturianu y internacional, que posibilitaron el surdimientu d’un grupu como Dixebra nuna ciudá como Avilés
La crisis del petróleu nos años 70, la llegada de la democracia formal, el nacimientu del asturianismu contemporáneu, la reestructuración del sector industrial, la llegada del punk, los medios alternativos de comunicación, el descubrimientu del nacionalitarismu llibertariu, l’impactu de les drogues, l’ambiente urbanu, los conflictos llaborales, la instauración del réxime autonómicu, el procesu de normativización del asturianu… son dalgunes de les cuestiones presentes na obra que dan les claves de por qué surde una formación musical como Dixebra y qué repercusión va tener too ello na so ideoloxía y mensaxe.
Nestes páxines tóquense cuestiones de calter históricu, social, cultural o llingüisticu, entellazaes con anécdotes o referencies biográfiques. Sicasí, como recueye la propia nota prensa del trabayu esto «nun ye un exerciciu de señardá vacíu, saber d’au venimos va facilitanos conocenos meyor a unes xeneraciones de les clases populares y trabayadores asturianes marcaes y moldeaes por unos fechos concretos de la historia recién. Al empar, la xente nuevo va tener la oportunidá de ser conscientes d’un periodu históricu crucial pa entender la sociedá asturiana d’anguaño y cómo foi dándose forma a los movimientos sociales y alternativos del nuestru país».
La editorial Trabe ye la encargada d’esta publicación, na que s’inclúi tamién abondo material gráficu (cartelería, semeyes, pegatines, etc), bien d’ello inéditu. Na recepción del premiu, Elipe declaró que «ye un honor ganar esti premiu, préstame pola vida, porque sentimentalmente representa muncho pa min, Yolanda foi y sigue siendo un referente pa toles persones que lluchamos por una Asturies y un mundo meyor». El xuráu, del que facíen parte Inaciu Galán (ganador de la edición anterior), Boni Pérez (escritor), Ánxelu G. Morán (escritor) y Esther Prieto (editora), faciendo de secretariu Pablo Rodríguez (historiador), otorgaron el gallardón por unanimidá, destacando nel acta’ «so valir testimonial y l’análisis que recueye del contestu cultural, político-ideolóxicu y socioeconómicu nel que surdió una de les formaciones musicales más importantes de les últimes décades n’Asturies».
Xune Elipe (Avilés, 1962) ye activista del movimientu de reivindicación llingüística dende mui mozu. Ye miembru fundador de la banda de rock Dixebra, con quien tien grabaos una quincena de discos. Creador del sellu discográficu L’Aguañaz, con más de setenta referencies editaes d’estilos estremaos. Ye’l reponsable de Goxe Producciones, empresa centrada nel ámbitu de la creación cultural asturiana y director del Anuariu de la Música Asturiana. Dirixó la serie documental D’ayeri a güei (TPA) sobre la historia de la música asturiana de magar hai rexistros sonoros, asina como responsabble del programa radiofónicu Al Son (RPA).
Tien publicaos los llibros: Llingua y rock (1992), Rockmería. Un repasu a la música popular del sieglu XX (2009), Dende la Casa Conceyu (2019) y Hai una llinia trazada. Historia de la música asturiana (XXVI Premiu d’Ensayu ‘Máximo Fuertes Acevedo’, 2022). Con Da-yos caña El tiempu y el contestu d’una banda de Rock Astur, completa una bibliografía protagonizada pola historia, les músiques y les lluches populares.
Suscríbite a les nuestres novedaes
