«La mocedá considérase falante pero nun topa actividaes enforma que-yos interese, sacando a la lluz dalgunes propuestes como la Batalla de Canciones n’Asturianu»

Esti sábadu 14 a les 17.30h celébrase nel Auditoriu Dr. Cienfuegos Xovellanos de L’Atayala de Cimavilla la primer Batalla de canciones n’asturianu, eventu entamáu pol Conseyu de la Mocedá de Xixón (CMX), la Oficina de Normalización de Llingüística de Xixón y @hhopcast -proyectu dinamizador del hiphop n’Asturies- que s’inspira nes Batalles de gallos que se dan dientro de la música rap. Nel certame pueden inscribise hasta un máximu de 20 solistes d’ente 14 y 35 años, cola condición de qu’han tener un mínimu de tres temes propios, como recueyen les sos bases. P’afondar nesta iniciativa falamos con dos de los organizadores del certame: Alma Hidalgo (Xixón, 2004), en representación del CMX y Diego Castañón ‘Crespo’ (Xixón, 1996), responsable de hhopcast.

¿Cómo, cuándo y por qué surdió esta iniciativa?

(Alma) Esta iniciativa surde va un añu y mediu, en rempuesta por parte del Conseyu de la Mocedá de Xixón, a la poca bayura d’actividaes encamentaes pa la xente mozo nun incluyío dientro del sistema d’educación obligatorio (ESO).

Lo que-y propusimos al Departamentu de Normalización Llingüística de Xixón, foi facer un estudiu sociollingüísticu nel qu’afondaremos al traviés d’un cuestionariu, si la xente mozo conocía los servicios públicos que favorecíen la normalización llingüística dientro del conceyu y la so ufierta, y cómo la camudaríen. Estes entrugues espardímosles ente xente mozo d’ente 14 a 35 años, algamando la conclusión viniente: la mocedá xixonesa considérase falante pero nun topa actividaes enforma que-yos interese, sacando a la lluz dalgunes propuestes como nesti casu, la I Batalla de Canciones n’Asturianu.

«Somos conscientes de que por mor de la diglosia, muncha xente ve l’asturianu como una torga, por ello creyemos qu’hai de facelo de primeres lo más abierto posible pa facer escuela»

L’eventu ta inspiráu nes Batalles de Gallos anque nesti casu ye una Batalla de Canciones. ¿Por qué escoyistis esti últimu formatu en cuenta del que se suel dar na música hip hop?

(Alma) Anque seyamos ambicioses, dende la organización (CMX, Hhopcast, Departamentu de Normalización Llingüística de Xixón), somos conscientes de que por mor de la diglosia, muncha xente ve l’asturianu como una torga, por ello creyemos qu’hai de facelo de primeres lo más abierto posible pa facer escuela y que nun futuru yá cuntemos con actividaes musicales n’asturianu muncho más concretes. ¡Quiciabes dientro unos años tengamos n’Asturies la primer gala Drag n’asturianu!

Sicasí, el hip hop ta bien presente en tol eventu. ¿Tolos artistes que van participar son xente venceyao al rap o va participar xente d’otros estilos

(Crespo) Va participar xente de diversos xéneros musicales. Esa ye la intencionalidá dende’l primer momentu y tamos algamando l’oxetivu. Ye verdá qu’esti formatu ye famosu ente’l xéneru rap pero hai exemplos de tou tipu.

«Va participar xente de diversos xéneros musicales. Ye verdá qu’esti formatu ye famosu ente’l xéneru rap pero hai exemplos de tou tipu y les inscripciones van tar abiertes hasta una hora enantes del eventu, pues apuntate ellí y too»

¿Pue sabese qué xente hai yá inscrito o polo menos el númberu d’artistes?

(Alma) Les inscripciones van tar abiertes hasta una hora enantes del eventu, pues apuntate ellí y too. La rempuesta si ye verdá que ta siendo mui positiva, ¡cuntamos con más de la metá del tope!

Crespo, tú yes ún de los organizadores del eventu como responsable del proyectu HHopcast. Les esperiencies de rap n’asturianu son poques en comparación con otros territorios con llingües minorizaes y tamién en comparación con otros estilos de música que se faen n’Asturies n’asturianu. ¿Por qué crees que ye asina y qué crees que faedría falta pa qu’hubiera más mocedá faciendo rap o otres músiques urbanes n’asturianu?

(Crespo) Nun sé’l motivu pero si se m’ocurre una solución: tien qu´haber un exemplu a siguir. El dia que la mocedá vea ún o una artista trunfar faciendo rap n’asturianu van quitase tolos complexos. Trátase de dalgo difícil pero non imposible.

«Tien qu´haber un exemplu a siguir. El dia que la mocedá vea ún o una artista trunfar faciendo rap n’asturianu van quitase tolos complexos»

Alma, tu yes parte del CMX. Ún de los oxetivos del eventu ye’l de facer actividaes n’asturianu pal públicu mozu d’Asturies. ¿Crees que les distintes programaciones que davezu se faen n’asturianu nun conecten cola mocedá ¿Cómo ves la situación del idioma ente les xeneraciones más nueves?

(Alma) Dende’l Conseyu tenemos el compromisu d’esparder les actividaes encamentaes poles instituciones, pero tamién el d’aseguranos que seyan actividaes de calidá que conecten y interesen, por ello apostamos por una programación pública n’asturianu pensada por y pa xente mozo. Lo que nun pue ser y se mos escaez munches vegaes ye que nun hai mocedá pensando les actividaes enfotaes a la xuventú, porque ensin querer, acaben nun conectando col so públicu oxetivu.

Tamos na era tik-tok, nel momentu del mamarrachéu, na dómina Rodrigo Cuevas y Puru Remangu. Tamos presenciando como les nueves voces de la nuesa tierra ven l’asturianu como imaxe de marca, eso fai que medre l’autoestima colectiva y que bien llueu teamos viviendo gracies a les nueves xeneraciones una realidá n’asturianu en tolos sentíos. Por ello, dende’l CMX esiximos a les instituciones que tean comprometíes col nuesu futuru llingüísticu, yá que los problemes a los que mos enfrentamos anguaño son estructurales. Namás hai un camín; la oficialidá.

«Lo que nun pue ser y se mos escaez munches vegaes ye que nun hai mocedá pensando les actividaes enfotaes a la xuventú, porque ensin querer, acaben nun conectando col so públicu oxetivu»

Dexáis bien claro tamién que «nun s’acepten espresiones o actitúes racistes, facistes o machistes nel eventu».

(Alma) Paeznos perimportante rescamplar en que’l nuevu asturianismu que tratamos de construyir tien que ser inclusivu pa toes. La normalización llingüística pola qu’apostamos tien de ser: transinclusiva, antifacista, feminista, LGTBIQ+ ya intercultural. Ye obligación nuesa facer pola decostrucción de los movimientos hestóricamente masculinizaos, agradecer a los qu’abrieron camín y esbrozar muncho más el prau pa qu’entremos toes.

Si tovía hai xente que nun tien claro s’inscribise o non, ¿Qué-yos diríeis pa que s’animaren?

(Alma) Lo primero, ¡qu’hai premios bien gordos! Lo segundo, que ye una oportunidá inédita pa que la xente te sienta, nun ye fácil topar en Xixón una tarima que te garantice que vas tener públicu y qu’anque nun ganes, ¡vas poder amosar la to música al altu la lleva!

¿Y p’animar al públicu a que s’avere esti sábadu a L’Atalaya?

(Crespo) Que van presenciar dalgo guapísimo. Ye posible que n’unos años saque cabeza xente que cantará’l sábadu. Si vas, vas poder dicir que tuvisti ellí, nun tolos díes vas poder formar parte d’un eventu hestóricu.