La mocedá echa grana nel Semando Fest

Entá nun yera la hora d’apertura de la sala y nel chigre cultural la Lata de Zinc la xente yá esperaba a los cuatro conciertos que diben desenvolvese. A les 20 hores, con un públicu enllenu de xente mozo y feminizáu enforma, el Semando Fest entamaba con Yedra Riesgo y Raúl Alonso, presentadores del programa radiofónicu Héroes ensin nome y del festival, saltando al escenariu faciendo una reivindicación de la música moza y l’espoxigue de la música de raigañu, celebrando amás los cinco años de trayectoria de musicasturiana.com. 

Ensin facese esperar, los primeros artistes, Alicia Villanueva y Luis Álvarez Pola, xubieron al escenariu. Ellí, respondieron a los presentadores que sí qu’hai relevu na asturianada, anque seya un xéneru menos venceyáu a la mocedá y empecipiaron a tocar nuna sala qu’aguardaba impaciente por sentir tonada, siendo’l conciertu de la xornada con más asistentes. Mientres dalgo más de media hora, los intérpretes dieron por entamada la folixa que se presentía na Lata de Zinc, nuna actuación que tuvo les sos sorpreses, como’l cantar cantáu a comuña con Iratxe Espina (Algaire) y Anabel Santiago, pero tamién momentos emotivos, como’l cantar que peslló la so puesta en escena, “A la madre del mineru”. 

Tres ello, yera tiempu del folk con calter atlánticu. Loína diba llevar a cabu la siguiente actuación, amosando que la música en familia ye posible -Andrea y Rodrigo Joglar son hermanos- y que la xente mozo tamién ta activa na cultura, talo como respondieron a les entrugues de les presentadores. El públicu esfrutó del conciertu, onde empezaron a vese los primeros bailles y cares bien conocíes, como les de los patriarques de la música asturiana Xune Elipe, Lisardo Lombardía, Naciu Llope o Fernando Orsona, ente otros. Col pieslle de l’actuación, Loína entá tuvo que volver al escenariu a tocar otra pieza tres los glayíos del públicu, que pidíen «otres trés». 

Llegaba’l tiempu del grupu asturianu más premiáu nos últimos años. Y Algaire amosó’l motivu d’ello. Bailles y glayíos, sobre manera na primer fila, acompañaron a una actuación qu’entamaba col mensaxe llanzáu poles sos componentes: tocar en casa nun tien comparanza con nada. D’esta mena, el grupu mierense ponía en pie a tola Lata de Zinc cola música tradicional fusionada, que taba entregada dafechu al Semando Fest. 

A Llevólu’l Sumiciu tocó-y quiciás la xera más difícil: poner el ramu al Semando Fest. Y cumplió con ello. La música de raigañu entemecida cola música lletrónica y les proyecciones audiovisuales punxeron pates arriba a una sala que nun quería dar por rematáu un momentu como’l que se taba viviendo na nueche del sábadu. Amás, reivindicaron que la so propuesta fai que la música asturiana siga con puxu. 

Na tarde-nueche del 4 de febreru tamién hubo momentu pa l’alcordanza, los agradecimientos y les reivindicaciones más p’allá de la música asturiana.  Xente como les figures clave fallecíes apocayá, Elías García o Diamantina Rodríguez, fueron recordaes mientres los conciertu de Loína y Alicia Villanueva, respectivamente; el equipu de trabayu, con especial protagonismu de les muyeres, llevó’l so merecíu aplausu y la oficialidá volvió a ser reclamada con lemes como «l’asturianu, llingua oficial».

Xicu Ariza, director de musicasturiana.com, definió l’eventu como «mui positivu y ablucante pa la música asturiana, al ver que la xente taba esperando dende’l primer momentu”. Destaca «la calidá y la variedá de los grupos que se presentaron nel eventu», pero pon enfotu nel públicu, «bastante distintu a lo que ta acostumbrada esta escena, con muncha presencia de la mocedá y con bona representación de les muyeres». Ariza añedió que «hai más grupos faciendo música n’asturianu y la intención ye siguir puxando por esti tipu d’eventos, como pue ser nuna segunda edición del Semando Fest». 

El Semando Fest yá ye hestoria. Y non porque rematara, sinón porque na xornada del sábadu asocedió ún de los eventos más importantes de la hestoria recién de la música y la cultura asturiana. El primer festival de música moza n’asturianu qu’acoyó la Lata de Zinc d’Uviéu cumplió toles espectatives y amuesa qu’esiste un relevu xeneracional na escena actual,pero tamién nel públicu, que respondió al llamamientu y onde la mocedá fízose notar. La xente mozo tamién llucha y puxa pola cultura. 

*Semeyes de los conciertos por Lucía Garó.