El pasáu llunes el musicólogu asturianu Llorián García Flórez foi convidáu a participar nun seminariu na reputada École des hautes études en sciences sociales (EHESS). El seminariu, entamáu polos musicólogos Marta Amico y Emmanuel Parent, de la universidá bretona de Rennes 2, xiró alredor del alcuentru ente musiques populares urbanes y etnomusicoloxía, y tuvo a la música asturiana como una de les sos temátiques d’interés.
El dinamismu de la escena asturiana sirvió como puntu de partida pa pensar a comuña dellos de los problemes clave que güei se dan nos alcuentros multiculturales, compartiendo espaciu de discusión con temes d’investigación tan diversos como la descolonización de la xeopolítica del dende América Latina, les modernidaes alternatives de la música tradicional en Malasia, l’antropoloxía de la burocracia musical, la descolonización al traviés del hip hop en Marsella, la escena de Bobolese Mandingo de Burkina Faso, les ficciones sonores del alioli y el reaggue, o el llímite de la noción de xéneru como forma de categorizar la heteroxeneidá musical.
Nel alcuentru, que tuvo llugar na emblemática Sala Norbert Elías, participaron tamién Julio Mendívil, de la University of Vienna; Adil Johan, de la Universidá de Malasia; Catherine Rudent, de la Nueva Universidá de la Sorbona; Rémi Boivin, del Centru Norbert Elias; Alfonso Castellanos y Julie Oleskiak, del Centru Georg Simmel; Jean-Christophe de la Universidá d’Avignon; y David Brackett, de la Universidá McGill.
L’alcuentru ye’l puntu d’arranque d’una espublización colectiva, de proyección internacional, que verá la lluz na primavera del añu que vien; y que contará tamién, nel casu asturianu, cola collaboración de la etnomusicóloga catalana Sílvia Martínez, de la Universidá Autónoma de Barcelona.
Suscríbite a les nuestres novedaes
