La música n’asturianu sema pal futuru

Si la primer edición del Semando Fest valió pa echar la grana, la nueche del 9 de febreru, fecha de la segunda edición del festival de música moza n’asturianu, sirvió pa ver los biltos d’esa semiente pola que musicasturiana.com y el so responsable, Xicu Ariza, apostaron dende’l primer intre.

Coles entraes escosaes dende dellos díes antes y magar del diluviu qu’anticipaba l’apertura de puertes, la Lata de Zinc foi, seliquino, enllenándose de xente. Un públicu onde había cares conocíes, como Xune Elipe, miembru de Dixebra, pero qu’amosaba una renovación na xente. Nesi sen, amuesa la bayura de la música fecha n’asturianu, con xente nuevo que s’interesa por ella y non un festival al que van los avezaos a esti tipu de conciertos.

Alredor de les 21:20, con Yedra Riesgo y el que suscribe esto xubiendo al escenariu, arrancaba’l II Semando Fest manifestando les necesidaes de sofitar lo fecho n’Asturies y n’asturianu nun contestu de represión llingüística per parte de dalgunos representantes políticos. 

Darréu, xubieron les primeres artistes: Noemí González y Sandra Álvarez, llevando la tonada y la poesía a una perspectiva nueva que nun se viera enantes. Col procuru y la sensibilidá que requieren los temes incluyíos nos poemes y cantares como l’albuertu o la menopausia, fixeron que la Lata cayera n’aplausos con cada amuesa poético-musical. Mención especial merez l’alcordanza fecha a Rosa Cunqueira, muyer referente nel caltenimientu de los raigaños asturianos nel suroccidente d’Asturies qu’afronta una recuperación de salú. Con Noemí y Sandra ábrese un xéneru nuevu na escena asturiana que promete muncho de cara al futuru. 

De la tonada pasóse a otru xéneru que tamién tien daqué poético, el hip hop. Mostru l’Horru foi’l siguiente grupu que saltó al escenariu coles sos lletres incendiaries y reivindicatives. Y ye que’l so cantante Fran, unu de tantos asturianos emigraos, amosó cola so rabia ónde ye quien quier ser, n’Asturies. Porque ye fiu d’un pueblu, l’asturianu. Acompañáu de Zeros a la guitarra y d’unu de los meyores DJs d’Asturies, JotadeJota, repasaron nesti formatu diferente los meyores temes de la banda, pero tamién presentó dalgunos nuevos. El públicu nun duldó en siguir el ritmu del únicu grupu actual de hiphop n’asturianu. Quiciás el siguiente naciera ente’l públicu. 

Con ello, aportó’l momentu folk de la nueche. Los sones celtes de Guieldu tresportaron la Lata de Zinc, per un momentu, a Lorient y a Ortigueira con los nueve temes que defendieron nel escenariu. Como nun podía ser d’otra manera, tamién hebo momentu p’alcordances. Una mui sentida pa una persona que finara dellos díes atrás: Fernando Rodríguez “L.luarca”, unu de los pioneros de Lorient y defensor del folk asturianu. El so recuerdu quedó nel son celta d’esti grupu. La reivindicación tamién tuvo presente mientres el so conciertu, onde volvió a glayase pola oficialidá de les llingües propies d’Asturies. Col tiempu xustu y col públicu pidiendo entá más, Guieldu fixo vibrar a la sala con “Ónde vas por agua”, tema col que se despidieron. 

Cola fin de los sones celtes, el punk d’Ochobre aportó al escenariu pa poner el ramu a la segunda edición del Semando Fest. El grupu, consideráu herederu de grupos como Skontra o Dixebra, entamó versionando a los valencianos Obrint Pas y presentó dellos temes, mesmo que tocó dalgunos de los más conocíos de la so discografía y Jorge de Guieldu collaboró nunu d’ellos. Quién sabe si nos meses vinientes habrá noticies sobre himnos nuevos de los ochobriegos. Con Natalia y Reichel amosando’l puxu de ser les úniques muyeres na escena rock n’asturianu magar de reivindicar “nun sentise soles” y la bayura de la música fecha por muyeres n’Asturies, el punk-folk arrexuntó a la xente, sobre manera nel últimu cantar, “Autodefensa, muyer”, onde les primeres files s’enllenaron de públicu femenín. Tanto, que repitieron el tema enantes de rematar el festival. 

Tolos grupos del II Semando Fest fixeron por amosar la so meyor versión, la bayura que tien la música fecha n’asturianu y fixeron de la nueche del vienres una fecha hestórica pa la cultura asturiana. Eso sí, una cita que nun sedría posible ensin el puxu de musicasturiana.com y Ixuxú Cultura, los y les trabayadores de la Lata de Zinc y Leti Cernuda, fotógrafa oficial del eventu nesta edición.

Faigan les sos apuestes polos grupos del añu viniente. La primer edición del Semando Fest foi semiente y la segunda foi biltu. La tercera va ser la del xorrecer. ¡Puxa la música n’asturianu y la cultura d’Asturies! ¡Puxa la xente mozo!

*Semeyes de los conciertos por Leticia Cernuda.

Dexa un comentariu

X