El periodista madrilanu Santi Escribano, responsable del programa 100Fuegos na emisora comunitaria Radio Xata de Pinto, ta acabante de presentar el segundu volume d’una triloxía centrada nes rellaciones ente la música rock (entendida ampliamente) y la política. La primera de les entregues titulábase La mecha (Ovejax Negras, 2021) y nella apaecen referenciaes un total de trenta bandes estatales y internacionales de los estilos más variaos, ente elles: Eina, KOP, Soziedad Alkohólica, Dropkick Murphys, Berri Txarrak, Kortatu, Reincidentes, Stiff Little Fingers, Dakidarría o Zoo. Al traviés de les lletres de cantares concretos d’estes formaciones, Escribano trata temes como los conflictos vascu, irlandés, armeniu y saharaui, la represión franquista, el movimientu antinuclear, la llucha antifascista o la cayida del llamáu socialismu real.
El segundu volume lleva por títuluLa Hoguera. Historias de política & rock (Ovejas Negrax, 2024) y sigue cola mesma filosofía del anterior, contando episodios de calter socio-políticu al traviés de les lletres de canciones de grupos musicales d’estilos estremaos, anque predominantemente de calter punk-rock. Nesta ocasión, el llibru ábrese con un capítulu tituláu «Con la música aprendí» y protagonícenlu los asturianos Dixebra; nél faise referencia al papel que tien la música combativa na formación política crítica, cultural y humana de munches persones. Precisamente la lletra del tema “Tres minutos” de los avilesinos trata sobre esta cuestión con estrofes como: «Ye lo qu’aprendí, solo tresmitir, tres minutos de comunicación y facer que te sientas un poco meyor. Ente cuerdes busco acordes y una historia que contar».
Rescampla l’autor del llibru qu’esta ye una de les poquísimes canciones que precisamente traten de la importancia de la música na toma de conciencia sobre los más variaos aspectos de tipu social y políticu, seyan históricos o actuales. Nesi sen, escribe: «con Dixebra aprendimos cosas: en “Dime como ye”, que el agente Mejuto perdió el “tolete” (la porra) en los disturbios de la Naval de Gijón en 1983. Con “Indios” aprendimos a despreciar el clasismo entre currantes para con la emigración, primero de otros puntos del estado y luego del resto del mundo… Con la música de Dixebra apoyamos las luchas antifascistas como el caso de los “35” (los años de cárcel que pedían a catorce detenidos en una manifestación contra Democracia Nacional en Cangas de Onís), obreras como la de la Duro Felguera con “Dieron en duro” o ecologistas como la lucha contra la plantación masiva de eucaliptos que nos narran con sorna en “Asturalia”: “¡Queremos ser una isla!”». Darréu, describe a la banda como «Testigos de la actualidad, herederos de una tradición. No es incompatible retratar el presente con conocer de dónde vienes». El capítulu acaba refiriéndose al tema “Tres minutos” como un homenaxe a la música como ferramienta de deprendimientu y tresmisión de valores.
Otres formaciones y temátiques
Nos siguientes capítulos de La hoguera apaecen citaes formaciones como Barricada, La Polla Records, Extremoduro, Negu Gorriak, Angelic Upstars, Body Count, Mano Negra o Talco, asina hasta venticinco nomes; tratando nesta ocasión socedíos, episodios o cuestiones como la connivencia del estáu col tráficu de drogues illegales en contestos de conflictividá social, el casu de los rapazos y rapaces d’Altsasu, la situación de los presos nes cárceles na llamada ‘Trans¡ción’, la historia del profesor Blair Peach (asesináu nuna carga policial mientres una manifestación antifascista en Londres), la historia de los partisanos na Italia fascista, la vida de la militante antifascista Julia Hermosilla (qu’intentó acabar con Franco en dos ocasiones), la resistencia nel Chile de Pinochet, o la dualidá del fútbol como deporte popular y espectáculu capitalista.
Nos próximos meses esta triloxía sobre politica y rock va dar acabación con un volume nuevu, nel que Santi Escribano va dar a conocer nueves histories pentemedies de los cantares de formaciones del rock más comprometíu y combativu.
Suscríbite a les nuestres novedaes
