El Premiu Camaretá al Meyor Cantar, promovíu pola Conseyería de Cultura, Política Llingüística y Turismu, yá tien finalistes pa la so edición del 2024: La Bonturné, Héctor Braga, Susana Gudín y Ferla Megía. El Teatru de La Llaboral de Xixón va acoyer el vienres 8 de payares la gala de la decimosesta edición d’esti premiu. Nella los artistes van defender en directo los cantares y va actuar tamién Vero Rubio, ganadora l’añu pasáu col cantar «Dixo miou padre«.
El Premiu Camaretá al Meyor Cantar ta dotáu con 6.000 euros, la realización d’un videoclip y actuaciones dientro del circuitu Autores nel Camín. Convócalu’l Gobiernu del d’Asturies cola mira de afianzar, prestixar y arriquecer la creación musical tanto n’asturianu como en gallego-asturianu.
La Bonturné, con «Odisea la nui«. Con componentes veteranos na escena musical asturiana desde va cuatro décades, esti cuartetu de maestros ufierten un repertoriu baillable nuna llinia bal-folk tradicional. El cantar tien lletra del escritor Paco Álvarez.
Héctor Braga, con «Llobatu«. Artista y productor multidisciplinar dedicáu a les músiques clásiques y al folk, con siete discos publicaos hasta la fecha, ye ún de los referentes más afianzaos na música del país con dellos premios y reconocimientos.
Susana Gudín, con «Contigo«. Sopranu llírica y artista multidisciplinar, vien participando en formaciones corales y orfeones dende 1991, amás de ser solista con grupos de música de toles menes y cola Orquesta Filarmónica d’Asturies.
Ferla Megía, con «Medrana a medrar«. Multi-instrumentista, compositor y diseñador, graba y produz la so música dende’l so estudiu en Feleches (Siero). Dende’l so pueblu crea música tradicional, música urbana, electrónica, ritmos sinuosos, con una variedá escomanada de samples y inspiraciones.
Suscríbite a les nuestres novedaes
