El Certamen del Quesu Cabrales va cellebrar so LIII edición el domingu 31 d’agostu de 2025, y dende’l sábadu 23 ufiértase un programa qu’axunta gastronomía, charres, lliteratura oral, proyecciones de documentales, mercáu… Nél la música asturiana tien un pesu considerable. Les actividaes entamen el sábadu 23 con un conciertu de Vicente Díaz a les 22.00h nel Parque Públicu d’Arenas de Cabrales. Pal martes 26 y el miércoles 27, dende les 11.00h el mercáu tradicional va tar animáu pola agrupación Óscar y La Banda.
El vienres 29 a les 22h ye’l turnu de la Banda de Gaitas Llacín: van llevar el so espectáculu Resollu, que presentaron el mes pasáu na Vega La Portiella de Llanes, y que foi un éxitu en toa regla. Permítome la llicencia de recomendar a tol que tenga la nueche llibre que vayan a sentir esti últimu trabayu de la banda en directu, porque paga la pena, y nun ye daqué que se vea a menudu.
El sábadu 30 va cellebrase nel marcu del certamen el «XXIV Memorial Gaiteros de Llonín. Pancho y Cundo». Va entamar a les 18.30h nel Parque Públicu d’Arenas, y va ufiertar tres actuaciones. En primer llugar, una muestra de canción asturiana na que van participar Cristina Sánchez Sánchez, Lorena Corripio López, Manuel Arenas Pérez ya Isaac Sierra Longo, acompañaos de Ricardo Soberado a la gaita y Andrea Joglar al tambor. Dempués, un conciertu de la Banda de Gaitas El Trasno, con collaboraciones de Rubén Bada, Kike Dembinsky, Eva tejedor y les Pandereteres y una pareya de baile formada por Laura García y Florencio Moro. Pa rematar, preséntase «Jota y lo Mudáu», del Grupu Folklóricu Corri Corri, con Ricardo Soberado a la gaita y Javi Tejedor al tambor.
L’ultimu dia, 31 d’agostu, día del certame, va haber un desfile a cargu de la Banda de Gaitas Picos de Europa y pol grupu Corri Corri, a les 11.00h, y yá pela tarde, a les 17.30h entama’l festival folklóricu nel Parque Públicu d’Arenas de Cabrales, nel que participen el grupu Corri Corri, la BG Picos de Europa, el Bando de San Roque (presentando’l Pericote), Xaréu d’Ochobre y Ar Vro Malo, grupu tradicional de Bretaña.
Suscríbite a les nuestres novedaes
