El sábadu 8 de febreru en Lata de Zinc (Uviéu) va celebrase’l III Semando Fest, festival de música moza n’asturianu qu’entamen Musicasturiana.com y Ixuxú Cultura. Nél van participar cuatro proyectos d’estremaos estilos musicales cola característica común de que la mayoría de los sos componentes son menores de 35 años. Melandru ye una banda de post-rock única dientro de la escena del rock fechu en llingua asturiana. Con ellos siguimos cola serie d’entrevistes dedicaes a afondar nes propuestes que van sonar nesta edición del Semando Fest con reflexones, amás, sobre la situación de la música moza del país anguaño.
Facéis música dientro del espectru del rock pero la vuestra propuesta ye bien estremada a les formaciones referentes del xéneru n’Asturies. Nesi sen, ¿qué ye lo que fai úniques les vuestres composiciones y interpretaciones?
[Iyán] Supongo que lo que fai úniques les nueses composiciones y interpretaciones ye l’amiestu de los gustos, instrumentos y formes d’averanos a la música de caún de los cuatro. Xuan entamó la so formación como baxista con Dudu Puente y tocando en grupos de punk rock. Varo lleva tola vida dientro’l mundu la gaita y la música tradicional. Carlos ye batería de rock y percusionista de música medieval y renacentista. Yo entamé nel jazz y llueu pasé pel rock y la música electrónica. Lo guapo de Melandru ye ver que tolos nuesos bagaxes s’axunten de manera natural. El resultáu, como pue vese, ye totalmente personal. Dempués de tolos años que llevamos tocando, siguimos esplorando les posibilidaes creatives d’amestar la gaita y l’asturianu con xéneros como’l rock alternativu, l’indie o la electrónica, y paez que tovía nun topamos fondu.
«Dempués de tolos años que llevamos tocando, siguimos esplorando les posibilidaes creatives d’amestar la gaita y l’asturianu con xéneros como’l rock alternativu, l’indie o la electrónica, y paez que tovía nun topamos fondu»
Lleváis andechando dende 2018, ¿cómo evolucionó’l grupu nestos siete años?
[Iyán] Dempués de toos estos años, siento qu’hai tres etapes na trayectoria de Melandru hasta agora. Los primeros años, dende qu’entamáremos en 2015 hasta’l 2019, foron intensos dafechu. Tocamos en munchos escenarios y festivales, y too ello culminó col llanzamientu del primer álbum y los conciertos en Lorient. Dempués d’esto vino una etapa un poco difícil pal grupu, en parte por culpa’l COVID, pero tamién porque tuvimos varios cambios na formación, replantegamientu del estilu… Nun foi hasta esti añu pasáu que retomamos l’actividá con ganes y fuercies, sacando’l nuestru segundu discu. Agora siento que’l grupu ta funcionando como facía tiempu nun lo facía. Supongo que son etapes, como too nesta vida.
Nel capítulu #28 d’Amosando falastis d’esi arcón de coses vieyes nel que muncha xente mete los instrumentos tradicionales como la gaita, ¿cómo pue valtiase esi prexuiciu dende la escena musical?
[Álvaro] El mundu de la gaita, como’l mundu d’otros instrumentos y espresiones culturales identitaries d’Asturies, ye un mundu con munches idees preconcebíes, en parte porque se da por fecho que siempres tuvieron ehí, o siempres debieron tar ehí inalterables nel tiempu. Ye dalgo de lo que, dende l’entamu de la mio vida como gaiteru, fui consciente mesmo de manera esterna al mio contestu que de manera interna tamién. Y sentíme siempres incómodu n’esi cuentu, entá más dende que formo parte de Melandru.
La idea de lo tradicional como únicamente una semeya d’entamos del sieglu XX simplifica y estereotipa lo que de verdá ye la tradición. Un poco aquello que dicía Jean Jaures de mantener la llama prendía en vez de caltener les cenices. Porque llueu ye curioso que pa dalgunos ye una semeya d’entamos del XX y pa otros una de mediaos del mesmu sieglu, o pa otros de finales de l’anterior… Creo más na realidá de que la música que facemos con estos instrumentos son caleyes d’ida y vuelta, como un contestu intemporal nel que se mira p’atrás, y débese mirar p’alantre pa caltenese constantemente nel momentu actual.
La mio xeneración yá medró nun mundu interconectáu y, nesi contestu, yo crecí escuchando al mesmu tiempu a Llan de Cubel y Radiohead, a bandes de gaites escoceses y a Fito Páez. Asina formóse la mio manera de facer música. Esto pasa agora mesmo y de manera tovía mas fácil nes xeneraciones más nueves. A la xente qu’entama a tocar nun se-yos puede enzarrar ente discos de pizarra de Lliberdón y desplica-yos que lo único que se puede facer ye eso, qu’otra cosa ta mal. Nun se puede poner puertes al campu. Ye necesario que lo conozan y que la xente tenga estos referentes, que tengan munchos referentes, pero anguaño a lo meyor lo que-yos apetez facer nel momentu que tengan control y conocimientu sobre l’instrumentu ye daqué que s’asemeye a Bad Bunny, y qu’esto ye lo más tradicional que puedan facer. Amás, esti camín ya lu percorrieron nel so momentu’l propiu Lliberdón, Capilla o Remis, ente otros.
Munches veces cayemos nel snobismu tradi pa xustificar que daqué nun nos presta o que daqué nun se puede facer. Creo que ye precisamente no que los proyectos musicales n’asturianu o identitarios asturianos nun tienen que cayer, pa nun dar la razón a quien nos coloca n’esa posición de lo que tien que ser apartao por supuestamente nun tar a la moda.
«La idea de lo tradicional como únicamente una semeya d’entamos del sieglu XX simplifica y estereotipa lo que de verdá ye la tradición»
¿Cómo veis el relevu xeneracional na música asturiana?
[Xuan] Tamos viendo que nos últimos años, gracies a la coneutividad y a los avances teunolóxicos, facer música y espardela pela rede ta convirtiéndose en daqué al alcance de cuasi tol mundu, especialmente de la xente mozo, los nativos dixitales. Esto fai que tean espoxigando dellos grupos y solistes xóvenes de munchu talentu faciendo música de tou tipu que, quiciabes, n’otros tiempos nun tendríen el sofitu nin la visibilidá que tán teniendo anguaño. Entós, paeznos que’l relevu va tar aseguráu, calteniendo la música tradicional y, sobre too, esplorando xéneros que tovía no tean tan avezaos al asturianu. Por poner un exemplu concretu, tamos encantaos col surdimientu de dellos artistes que combinen la música electrónica cola nuesa llingua y cultura.
«Paeznos que’l relevu va tar aseguráu, calteniendo la música tradicional y, sobre too, esplorando xéneros que tovía no tean tan avezaos al asturianu»
¿Qué dificultaes topastis como grupu mozu pa entamar y afitavos na escena?
[Álvaro] En delles coses tuvimos suerte siempre, como na posibilidá de tener llocales d’ensayu porque na zona rural -d’onde somos la mayoría- tovía puedes alcontrar un requexu onde ensayar, nun molestar y que seya asequible. Afitase na escena yá ye otru tema. Alcuérdome de la primer vegada que vino a venos Xicu Ariza y comentónos que lo díbamos tener complicao, pero qu’insistiéramos. Tuvo y tien razón: dientro de la escena de música n’asturianu foi difícil abrir camin -tovía m’alcuerdo y fáenme gracia comentarios tipo “pero, qué coño facéis” o “¿qué ye, Vetusta Morla pero n’asturianu?»-, pero, per otru llau, tenemos muncha xente que nos sigue porque-yos presta la escena post-rock o rock alternativu. Préstanos pensar que per esti llau abrimos una ventana a que la escena de música fecha n’asturianu tenga mas públicu.
«Creo que lo qu’aporta Melandru ye una propuesta musical mui singular y personal dientro del panorama asturianu. Quiciabes nun ye la más popular o que meyor respuenda al gustu más xeneralizáu, pero sí ta fecha con cariñu, trabayu y esfrute»
¿Qué aporta la vuestra propuesta a la escena moza?
[Iyán] Creo que lo qu’aporta Melandru ye una propuesta musical mui singular y personal dientro del panorama asturianu. Quiciabes nun ye la más popular o que meyor respuenda al gustu más xeneralizáu, pero sí ta fecha con cariñu, trabayu y esfrute. Pa nós, al menos, ye asina. Como ya comenté, esti añu fai 10 qu’entamamos el grupu y tovía nun nos cansamos de tocar temes como ‘Tallueu’, ‘Dios Tecnolóxicu’ o ‘Na’, que lleven acompañándonos dende l’entamu. Son realmente parte de nós, de la nuesa vida emocional, y asina queremos intentar tresmitilo al públicu que nos escucha nos discos o conciertos, a la nuesa familia y los nuesos amigos. Anque faga menos d’un añu que sacamos el segundu álbum, yá entamamos a tener les mesmes sensaciones con cantares como ‘Shinji sube al EVA’, ‘3 de Xunu’ o ’28 díes’.
¿Faen falta más proyectos de música moza n’Asturies? ¿Qué formatu-yos daríeis?
[Xuan] Sí. Tolo que seya sofitar la cultura siempres ye daqué arriquecedor. Tamos encantaos cola cantidá de sales y espacios nuevos onde tocar que tán apaeciendo nos últimos años; enantes paecía que nun había ufierta cultural y anguaño tolos días hai daqué. Les iniciatives multixéneru como Semando Fest dan visibilidá a tipos de música mui estremaos y permiten al públicu descubrir tola ufierta que tenemos n’Asturies. Taríemos, entós, naguando por iniciatives que sofitaren les nueves escenes asturianes, saliéndose de la escena tradicional y de rock/punk clásiques, y dando-y un espaciu a la nueva realidá musical asturiana.
«Les iniciatives multixéneru como Semando Fest dan visibilidá a tipos de música mui estremaos y permiten al públicu descubrir tola ufierta que tenemos n’Asturies»
¿Qué otros grupos mozos d’anguaño o d’antaño vos inspiraron?
[Iyán] Ye verdá que gran parte de les nueses influyencies vienen de nacionalidaes mui diverses. Hai que dicir, por exemplu, que tenemos cierta predilección pola música islandesa: Sigur Ros, Björk, Ólafur Arnalds… son músicos que nos inspiren sobremanera. Si pensamos na escena asturiana, munchos de los nuesos referentes provienen de la escena del Xixón Sound. Especialmente aquelles propuestes más averaes al rock esperimetal o el post-rock, como ye ‘Estratexa’ de Manta Ray. Tampoco nun podemos escaecer a Dixebra, sobre too los sos discos más duros. El soníu de gaita más guitarres metaleres al estilu Rage Against the Machine foi una referencia importante pa encaxar la gaita na nuesa música. Si pensamos en grupos o artistes d’anguaño, préstennos muncho les propuestes actuales d’electrónica d’artistes como Fruela 757.
N’Asturies, anque poca por dellos motivos y, ente ellos, la emigración, hai música moza, pero munches propuestes nun escueyen l’asturianu nes sos composiciones, ¿por qué pensáis que ye?
[Carlos] Na mio opinión, xúntense dellos motivos. Per un llau falta da-y mayor usu a la nuesa llingua, integrala nel día a día y na educación; conocela y falala ye la manera de caltenela. Per otru, pienso qu’anguaño nun se-y da’l mesmu reconocimientu al asturianu como a otres espresiones culturales. Mientres que s’acepta y vende con arguyu la nuesa grastronomía, musica, baille o tradiciones, hai un estigma sobre la llingua, anoxáu amás pol panorama políticu tan nocivu que nos arrodia. Oxalá esto ameyore y viéramos más bandes usando l’asturianu. Pienso que la música pue ser el mediu perfectu p’averar la riqueza llingüística del país.
«Pienso qu’anguaño nun se-y da’l mesmu reconocimientu al asturianu como a otres espresiones culturales. Mientres que s’acepta y vende con arguyu la nuesa grastronomía, musica, baille o tradiciones, hai un estigma sobre la llingua»
Yá p’acabar, ¿qué podéis avanzanos del vuestru conciertu nel Semando Fest?
[Iyán] Tenemos pensao repasar les canciones del nuevu discu, que tovía ta reciente, asina como los «clásicos» del primeru. Tamién podemos dir avanzando que va haber repertoriu nuevu nel que tamos trabayando.
No se encontraron resultados
Puedes probar vaciar cualquier filtro o dirígete a nuestro inicio de la tienda
Suscríbite a les nuestres novedaes
