El Semando Fest sigue anunciando novedaes pa la so tercer edición. Tres de presentar a Abéu, Ferla Megía y Alienda, l’eventu entamáu por Musicasturiana.com y Ixuxú Cultura da l’últimu nome del so cartelu: Melandru. D’esta manera afítase la pluralidá d’estilos que van sonar na sala Lata de Zinc d’Uviéu el sábadu 8 de febreru; dende la música tradicional fecha pal baille hasta propuestes renovadores influyíes pol pop, la música urbana y la tradición, pasando pel folk y el rock.
Melandru ye una xoven banda de post-rock única dientro de la escena del rock fechu en llingua asturiana. Tres debutar en 2018 con un discu homónimu de cinco temes, presentaron esti añu II, un EP con un soníu menos escuru y con influencies de la música electrónica. Con esti álbum que presentaron nel capítulu 28 d’Amosando, el grupu siguió afondando na so propuesta envolvente onde prima lo instrumental, anque la voz tamién tien el so espaciu.
La selmana que vien va anunciase’l cartelu completu diseñáu pola artista xixonesa Paula Suárez Surimi y van ponese a la venta les entraes na tienda online de Musicasturiana.com. El III Semando Fest ye una iniciativa que nagua por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.
Suscríbite a les nuestres novedaes
