Estrenamos “L’asturianu sal con nós”, el cantar de Xaime Martínez pal Día de la Reciella

El sábadu 2 d’ochobre de 11h a 19h va cellebrase nel Muséu del Pueblu d’Asturies de Xixón el VIII Día de la Reciella, «una xornada d’ociu, deporte y actividaes pa tola familia que tienen en común l’asturianu como llingua vehicular», como define l’asociación que lu entama, Reciella Families Pol Asturianu. Dende va unos años, un cantar pon-y banda sonora a esti día tan especial y necesariu pa la cultura asturiana. Yá participaron Skama la Rede con “Entaína“, David Varela con “N’asturianu, sumes“, Pop Piquiñín con “Espoxiga“, Alicia Álvarez con “Préstame pola vida“; y esti 2021 l’encargáu de facer el cantar son Xaime Martínez y La Familia Tradicional con “L’asturianu sal con nós“.

«Como teníemos la idea orixinal de que l’asturianu sal con nós (del confinamientu, pero tamién de casa en xeneral), pensemos en más coses que salen, faciendo por xunir dellos campos a priori contradictorios», comenta’l músicu y escritor uviedín alredor d’esti cantar «con una producción punk-pop» y un soníu propiu compuesto por él xunto a la so banda, La Familia Tradicional. El tema estrénase güei n’esclusiva musicasturiana.com -entidá collaboradora col Día de La Reciella xunto a otres asociaciones, empreses y instituciones públiques como l’Ayuntamientu de Xixón-, y va asoleyar esti vienres 17 en toles plataformes dixitales. El videuclip, realizáu por Pablo A. Quiroga Prendes y Juan Tizón, va salir nos próximos díes.

Calca na imaxen pa sentir el cantar n’esclusiva

Mercar na tienda online discos pa la reciella

Mira los videoclips