San Pedro ye’l patrón de La Pola Siero y dende l’Asociación Amigos del Roble y l’Asociación de Folclore Amigos de la Tradición (AFATRA) recuperaron esta celebración y diéron-y una programación na que la música asturiana tien muncho protagonismu. Esti añu festéxenla la viéspora de San Pedro, el domingu 28 de xunu, y ente les actividaes musicales va haber alborada, vermú musical y una xuntanza pal baille y la música tradicional, amás de cantar les sampedraes cola plantada’l roble.
A les diez de la mañana entama l’alborada peles cais de la villa y a les 14h hai un vermú musical cola que los sones del país van percorrer los chigres collaboradores del eventu. Pa les 17.30h tien llugar lo más novedoso de la programación d’esti añu, una xuntanza en Les Campes na que va haber un taller de baille a lo suelto, dedicáu a los bailles de lo pesao, lo lixero y la muñeira. Amás dende la organización conviden a la xente a que participe con «panderetes, pandeiros, castañueles, payel.les, gaites, tambores, curdiones… ensin otra pretensión que pasalo podre».
Esta xuntanza va durar hasta les 20h, hora na que llega’l roble, que va plantase a la medianueche tamién na Plaza Les Campes, onde van cantase les sampedraes mentanto se coloca l’árbol. Con esta actividá Amigos del Roble y Afatra siguen trabayando pola recuperación de les tradiciones de La Pola Siero y de la cultura asturiana en xeneral.
Suscríbite a les nuestres novedaes
