La Pola de Siero va volver ser l’epicentru de la música popular asturiana el próximu vienres 13 de febreru cola celebración del XIX Certame de Cancios de Chigre, una cita yá bien afitada na axenda cultural polesa y venceyada al vienres de Comadrines. L’Asociación Amigos del Roble ta acabante de publicar les bases y d’abrir el plazu d’inscripción -a traviés del corréu asociacion@amigosdelroble.com– pa que puedan participar distintes tertulies musicales formaes por ente cuatro y diez persones.
«Recuperar l’espíritu daquelles tertulies que s’entamaben alredor de la sidra en La Pola Siero» ye l’oxetivu d’esti certame que vien faciéndose dende hai cuasi dos décades, convirtiéndose nuna singular cita qu’axunta patrimoniu oral, participación popular y reivindicación de la cultura popular asturiana.
Según publiquen les bases, les tertulies que quieran participar nesta XIX edición han d’interpretar un repertoriu compuestu por cantares populares. Pa ello, la organización va repartir alredor de 2000 cancioneros con un llistáu de cantares propuestos. L’acompañamientu instrumental va ser namás acústicu y les actuaciones van desendolcase nos establecimientos hosteleros collaboradores ente les 21h y les 23h, anque cada llocal va poder acordar directamente cola tertulia una posible prolongación. Amás d’esto, la organización va ser la encargada del repartu de les tertulies pelos chigres participantes, basándose «nel principiu d’igualdá y equidá«.
Les bases redactaes por Amigos del Roble complétense recoyendo les tertulies participantes van tar invitaes al actu de presentación y entrega de la insignia d’honor al padrín o madrina d’esta XIX edición, que va celebrase’l mesmu día del certame, en llugar y hora qu’anunciarán próximamente. Amás, la organización recuerda que los establecimientos hosteleres van atender a les persones que formen cada tertulia no tocante a cena y bebides mientres el desarrollu del certame, Na edición delpasáu añu participaron doce tertulies y tamién hubo un «correchigres» animáu por Anabel Santiago, Néstor Díaz, Alicia Villanueva, Valentín Fuente y Xuacu Areces.
Suscríbite a les nuestres novedaes
