La tonada lletrónica de Fruela 757 y Lucía Rojo conviértese na última confirmación de la cuarta edición del Semando Fest. Tres la primer muestra de Tonada Lletrónica nel festival Artístiques, entamáu por Puru Remangu ya Ixuxú Cultura, esta actuación tan novedosa vuelve a los escenarios. Va ser, eso sí, la primer vez en directo d’estos dos músicos, qu’anque actuaron xuntos nel programa Xuntanza de la TPA, enxamás tocaron en nengún eventu.
Lucía Rojo ye una de les meyores voces xóvenes de la canción asturiana, escena a la que s’averó a los nueve años. Percorrió cuasi tolos concursos del xéneru ganando dalgunos premios nacionales na estaya xuvenil y minera. Pela so parte, Fruela 757 ye una de les propuestes más orixinales de la música’l país. Nel so repertoriu suena ReggaeToná, HipFolk, DrumAmbás… o lo que ye lo mesmo, música popular asturiana amestada a soníos internacionales de la música urbana del sieglu XXI como’l hiphop, el reggaeton o la electrónica.
Con esta confirmación, zárranse les anuncies d’actuaciones y mañana, día 26 d’avientu, van salir les entraes a la venta na plataforma entradium.com.
Suscríbite a les nuestres novedaes
