El 9 de mayu Héctor Braga asoleyó Rabil, el so octavu trabayu en solitario. El multiinstrumentista sigue dando novedaes en rellación d’esti trabayu y, coincidiendo col día de Navidá, estrena na so canal de YouTube’l lyric video de ‘El Penitente’, tema qu’inclúi la collaboración de la Banda Gaites LaKadarma.
Rabil ye l’últimu trabayu d’un músicu que tien caleyáu pel folk, la música tradicional, la canción d’autor y l’asturianada. Nél amuesa’l so soníu más folk, más celta y más rockeru a lo llargo de diez temes nos que rescamplen destacaes collaboraciones y nos que la gaita rabil o zanfona ye la protagonista.
Foron tres años de trabayu pa dar forma a un álbum nel que la gaita rabil percuerre cantares al rodiu lleendes, historia y mitoloxía que suenen sobre melodíes de contundente folk celta. Producíu por Javier Blanco (Mägo de Oz, Sôber), nel álbum collaboren una montonera d’artistes: Víctor Manuel, Hevia, Algaire, Baxel, Deira, Joaquín Díaz, Luis Delgado, Óscar Ibáñez y Bango, amás de les bandes de gaites Picos d’Europa, LaKadarma y la berciana Castro Bérgidum.
Suscríbite a les nuestres novedaes
