Óliver Suárez, responsable de Divertia en Xixón, caltién les sos declaraciones contraries al asturianu

«Nun me gustaría que s’usaran les actuaciones musicales, por exemplu, pa tratar de promocionar una llingua que nun esiste». La frase díxola nel diariu El Comercio Óliver Suárez, Presidente de Divertia y ex conceyal de Vox dempués de que l’alcaldesa Carmen Moriyón espulsara del gobiernu municipal a la otra conceyala de Vox y diputada Sandra Álvarez Rouco. D’esta manera, pesie a la amplísima aprobación de la moción Música n’asturianu SÍ“, dende parte del Ayuntamientu de Xixón caltiénense les declaraciones contraries a los derechos de los creadores culturales en llingua asturiana y de la so industria.

Dende Iniciativa pol Asturianu denunciaron ayeri estos fechos nun comunicáu: «Ye inalmisible qu’un cargu públicu faiga declaraciones como estes, yá que suponen l’afitamientu de la discriminación de la ciudadanía falante d’asturianu, asina como un ataque a un patrimoniu cultural protexíu pol Estatutu d’Autonomía d’Asturies, la Ordenanza de Normalización Llingüística de Xixón y, por supuestu, la Constitución española». Amás, el colectivu en defensa del asturianu esixó a Carmen Moriyón «que destituya de forma inmediata al presidente de Divertia», al tratase esta empresa pública de la responsable de la programación de festexos, del Teatru Xovellanos y del Festival Internacional de Cine de Xixón.

Iniciativa pol Asturianu tamién pidió al PP que, como sociu del gobiernu local, tenga «un posicionamientu claru énte esta discriminación pa col asturianu y los artistes qu’usen esta llingua nes sos creaciones». Pel momentu, nun hubo nenguna respuesta pública dende’l gobiernu municipal. Lo que sí se conoz ye la programación del Teatru Xovellanos pal primer semestre de 2024 que, según sorrayó’l periodista d’El Comercio a Óliver Suárez tien «una reducción d’actuaciones venceyaes al asturianu»: «Nun respuende a nenguna directriz mía. Si’l datu que me diz ye correctu entiendo que ye por falta d’ufierta», respondió l’ex conceyal de Vox en llinia col so negacionismu de la existencia d’un idioma propiu y d’una bayurosa creación cultural nél.

Na semeya Leticia Baselgas lleendo’l comunicáu de “Música n’asturianu SÍ” na rueda prensa celebrada esti branu.

Dexa un comentariu

X